ކުރީގެ ބަންޑާރަ ނައިބުންނާއި ސިޔާސީ ޕާޓީތަކުން މިދިޔަ ހަފްތާގައި ބޭއްވި ނޫސްވެރިންގެ ބައްދަލުވުމުގައި ކުރީގެ ބަންޑާރަ ނައިބު އައިޝަތު އާޒިމާ ޝަކޫރު ވިދާޅުވީ ޗާގޯސްގެ މައްސަލާގައި ރާއްޖެއިން ގެންގުޅެމުންދިޔަ ސްޓޭންޑް ފުރަތަމަވެސް ބަދަލުވީ 2010 ވަނަ އަހަރު ކަމަށެވެ. އެއީ ރައީސް މުހައްމަދު ނަޝީދުގެ ވެރިކަމުގައެވެ.
އޭރު ހާރިޖީ ވަޒީރަކަށް ހުންނެވީ ޑރ ޝަހީދު އެވެ. ނަމަވެސް ޑރ ޝަހީދު ކުރެއްވި ޓްވިޓެއްގައި އާޒިމާގެ އެވާހަކަތައް ވަނީ ދޮގު ކުރައްވާފައެވެ.
ޑރ ޝަހީދު ވިދާޅުވީ ރާއްޖެއަށް މިނިވަންކަން ލިބުނީންސުރެ 16 ޑިސެމްބަރު 1965 އިން ފެށިގެން ވެސް ރާއްޖޭގެ ސިޔާސަތަކީ ޗާގޯސް އަކީ މޮރިޝަސް އަށް ލިބެންޖެހޭ ތަނެއްގެ ގޮތުގައި ބަލައިގަތުން ކަމަށެވެ. ޝަހީދު ވިދާޅުވި ގޮތުގައި 1986، 1983، 1997، 2002 އަދި އެހެން ފަހަރުތަކުގައި ވެސް ރާއްޖެއިން މިމައްސަލާގައި ދެމެހެއްޓީ ޗާގޯސް މޮރިޝަޝްއަށް ލިބެންޖެހޭކަމުގެ ސިޔާސަތު ކަމަށެވެ.
ޑރ ޝަހީދު ވިދާޅުވީ އެހެން އެކަން އޮތް ނަމަވެސް ރާއްޖޭގެ އީއީޒެޑްގެ މައްސަލާގައި މޮރިޝަޝްއާއި ކުރާނެ މަޝްވަރާއެއް ނެތްކަމަށް 2010 ގައިވެސް ރާއްޖެއިން ބުނިކަމަށެވެ. އެގޮތަށް ރާއްޖެއިން ބުނަމުން ގެންދިޔައީ ޗާގޯސް އިނގިރޭސިންގެ ބާރުގެ ދަށުގައި އޮތުމުންކަމަށް ޑރ ޝަހީދު ވިދާޅުވިއެވެ.
އަދި ރާއްޖޭގެ އީއީޒެޑްގެ މައްސަލާގައި މޮރިޝަޝްއާއި ރާއްޖެއިން މަޝްވަރާކުރާނީ މޮރިޝަޝްއަށް ޗާގޯސް ލިބުނު ދުވަހަކުންކަމަށް 2010 ގައިވެސް ރާއްޖެއިން ބުނެފައިވާނެކަމަށް ޑރ ޝަހީދު ވިދާޅުވިއެވެ.
