ކްރިމިނަލް ކޯޓުން މި ހުކުމްކޮށްފައިވަނީ 1500 ވަގު ޑޮލަރަށް އޮޅުވާލައިގެން ފޯނެއް ގަތް ދެކުނުގެ ރަށެއްގެ ފިރިހެނެއްގެ މައްޗަށެވެ.
މި މައްސަލައިގެ ޝަރީއަތުގެ މަޖލީހުގައި އެ ފިރިހެން މީހާވަނީ އެ މީހާ ކުރި ކުށަށް އިއުތިރާފުވެފައެވެ. އެހެންކަމުން މައްސަލަ ކުރިއަށް ގެންގޮސްފައިވަނީ އަވަސްނިޔާގެ މައްސަލައެއްގެ ގޮތުގައެވެ.
މިދިޔަ އަހަރުގެ ނޮވެންބަރު މަހު ހިނގި މި ހާދިސާއާ ގުޅިގެން ދައުލަތުން ދައުވާ ކުރި މީހާގެ މައްޗަށް ކުށް ސާބިތުވެ އަސާސީ އަދަބެއްގެ ގޮތުގައި ކަނޑައެޅީ އެއް އަހަރާއި ހަތް މަހާއި ހަ ދުވަހުގެ ޖަލު ހުކުމެކެވެ. އެހެންނަމަވެސް އެ މީހާގެ މައްޗަށް ކުރިން ޖިނާއީ ކުށެއް ސާބިތުވެފައިވާތީ ހުކުމުގެ މުއްދަތު އިތުރު ކުރިއެވެ. އަދި އަމިއްލައަށް އިއުތިރާފުވެ އަވަސް ނިޔާގެ މައްސަލައެއްގެ ގޮތުގައި ކުރިއަށް ގެންދިޔުމުން އަނެއްކާވެސް އަދަބު ލުއި ކުރިއެވެ. އަދި މި މައްސަލައާ ގުޅިގެން އެ މީހާ ކުރިން ބަންދުކޮށްފައިވާ މުއްދަތު އުނިކުރުމަށް ފަހު، ނުވަމަހާއި 12 ދުވަހުގެ ޖަލު ހުކުމެއް ކަނޑައެޅުމަށް ފަހު، ކުށްވެރިޔާގެ އެދުމުގެ މަތިން އަދަބު ބަދަލުކޮށްދިނެވެ.
މި މައްސަލައިގައި މައްސަލަ ބެއްލެވި ސަފްވަތު ހަބީބު މިއަދު ކުރެއްވި ހުކުމަކީ، 38400 ރުފިޔާއިން އެ މީހާ ޖޫރިމަނާކޮށް، 480 ގަޑިއިރަށް މުޖުތަމައަށް ހިދުމަތް ކުރުމުގެ ހުކުމެވެ.
