ދިވެހި ފުލުހުންގެ ހިދުމަތާއި ޔުނިސެފް މޯލްޑިވްސް ގުޅިގެން މިއަހަރުގެ ކުޑަކުދިންގެ ދުވަސް ކުލަގަދަކޮށް ފާހަގަކުރުމަށް ބޭއްވި ހަރަކާތްތަކުގެ ތެރޭގައި ހިމެނިގެން ގއ ގެމަނަފުށީގައި ހުކުރު ދުވަހު ބޭއްވި ކުޑަކުދިންގެ ހަވީރު ހުޅުއްވާދެއްވާ ޝަރަފުވެރިކޮށްދެއްވީ ފަސްޓްލޭޑީ ފަޒްނާ އަހުމަދެވެ.
މި ކުޑަކުދިންގެ ހަވީރުގައި ގެމަނަފުށީގެ ގިނަ އަދަދެއްގެ ކުޑަކުދިން ބައިވެރިވެފައިވާއިރު ރައީސުލްޖުމްހޫރިއްޔާގެ އަނބިކަނބަލުން ވަނީ ކުޑަކުދިންނާއެކު ވަގުތުކޮޅެއް ހޭދަކޮށްލައްވާފަ އެވެ.
މި ހަރަކާތުގެ ތެރެއިން އެންމެންގެ ލޮލުގައި އެންމެ ބޮޑަށް އަޅައިގަތީ ތުއްތު ކުއްޖަކު ފަސްޓްލޭޑީއަށް ވެދުމަށް އެރުވި ފިނިފެން މަލެވެ.
ފަސްޓްލޭޑީ ފިނިފެންމާ ހިއްޕަވައިގެން
ކަރުދާހުން ހަދާފައިވާ ރީތި ފިނިފެންމާ ފަސްޓްލޭޑީ ވަނީ ހަރަކާތުގެ ތެރޭގައި ގެންގުޅުއްވާފައެވެ.
ގެމަނަފުށީގައި ބޭއްވި ކުޑަކުދިންގެ ހަވީރަށްފަހު ރައީސުލްޖުމްހޫރިއްޔާގެ އަނބިކަނބަލުން ވަނީ ޔުނިސެފް މޯލްޑިވްސްއިން ރާއްޖޭގެ ސްކޫލްތަކަށް ހުޅުވާލައިގެން ބޭއްވި ކުރެހުމުގެ މުބާރާތުގެ ކުރެހުންތައް ދައްކާލުމަށް ގެމަނަފުށީ ސްކޫލުގައި ހުޅުވާފައިވާ އާރޓް އެގްޒިބިޝަނަށް ޒިޔާރަތްކުރައްވައި ދަރިވަރުންގެ ކުރެހުންތައް ބައްލަވާލައްވާފައެވެ.
