ރީޖަނަލް އެއާޕޯޓްސް ކޮމްޕެނީ ލިމިޓެޑް (އާރްއޭސީއެލް) ގެ ފަރާތުން ހިންގަމުން އަންނަ ކުޅުދުއްފުށި އެއާޕޯޓުގައި ނައިޓް ލޭންޑިންގް ސިސްޓަމް ގާއިމުކުރެވި ނައިޓް ލޭންޑިންގްގެ ހިދުމަތް ރަސްމީކޮށް ފެށުމަށް އަޅަން ޖެހޭ ޓެސްޓް ރޭ ކާމިޔާބު ކަމާ އެކު ޖައްސާފައިވާ ކަމަށް އާރްއޭސީއެލުން ބުނެއެވެ.
އާރްއޭސީއެލުން ބުނެފައިވަނީ ނައިޓް ލޭންޑިންގްގެ ހިދުމަތާ އެކު ކުޅުދުއްފުށި އެއާޕޯޓުން ދެވޭ ހިދުމަތްތައް 24 ގަޑިއިރަށް ބަދަލުވެގެން ދާނެ ކަމަށެވެ. މިއީ ކުޅުދުއްފުށި އެއާޕޯޓުން ދެވޭ ހިދުމަތްތައް އިތުރު ހަރުފަތަކަށް ގެނައުމަށް ކުރެވިގެން ދިޔަ ވަރަށް ބޮޑު މަސައްކަތެއް ކަމަށް އެ ކުންފުނިން ބުނެއެެވެ.
އާރްއޭސީއެލުން ބުނި ގޮތުގައި އެ ކަމުގެ ސަބަބުން ކުޅުދުއްފުއްޓާއި ކައިރީގައިވާ ރަށްތަކުގައި ދިރިއުޅޭ ރައްޔިތުންނަށް ދިމާވެފައިވާ ދަތިތަކަށް ހައްލެއް ލިބި ރޭގަނޑު ވައިގެ މަގުން ދަތުރު ކުރުމަށް މަގުފަހި ވެގެން ދާނެ ކަމުގައެވެ.
ރައްޔިތުންނަށް ލިބޭ އެންމެ ބޮޑު ހިތްހަމަޖެހުމަކަށް ވާނީ ކުއްލި ހާލަތްތަކުގައި ބަލި މީހުން ރޭގަނޑު ވައިގެ މަގުން އުފުލުމަށް އޮތް ހުރަހަށް ނިމުމެއް އައުން ކަމަށް އާރްއޭސީއެލުން ބުނެއެވެ. އޭގެ އިތުރުން ވިޔަފާރިތަކަށާއި ގެސްޓް ހައުސް އަދި ރިސޯޓުތައް ހިންގާ ފަރާތްތަކަށް އިތުރު މަންފާތަކެއް ލިބިގެން ދާނެ ކަމަށް އާރްއޭސީއެލުން ބުނެއެވެ.
ކުޅުދުއްފުށި އެއާޕޯޓުގައި ނައިޓް ލޭންޑިންގްގެ ހިދުމަތް ފެށުމަށް ރޭ މެންދަމު ޖެއްސި ޓެސްޓް ފްލައިޓް - ފޮޓޯ:ޖައުފަރު އަލީ
އާރްއޭސީއެލުން ބުނީ ކުޅުދުއްފުށި އެއާޕޯޓުގެ އިތުރުން އާރްއޭސީއެލްގެ ފަރާތުން ހިންގަމުންދާ ހޯރަފުށި އެއާޕޯޓާއި މާވަރުލު އެއާޕޯޓުގައި ނައިޓް ލޭންޑިންގް ސިސްޓަމް ގާއިމުކުރުމުގެ މަސައްކަތް ކުރަމުންދާ ކަމަށެވެ. އެ މަސައްކަތްތައް ކުރިއަށް އޮތް މަހެއްހާ ދުވަހުގެ ތެރޭގައި ނިންމައި ނައިޓް ލޭންޑިންގްގެ ހިދުމަތް އެ ދެ އެއާޕޯޓުގައި ފެށޭނެ ކަމަށް ގަބޫލުކުރެވޭ ކަމަށް އާރްއޭސީއެލުން ބުނެއެވެ.
އާރްއޭސީއެލުން ބުނި ގޮތުގައި ކުޅުދުއްފުށި އެއާޕޯޓާ އެކު އެ ކުންފުނިން ހިންގަމުން ގެންދާ އެއާޕޯޓުތަކުގެ ތެރެއިން ނައިޓް ލޭންޑިންގްގެ ހިދުމަތް ދެވޭ އެއާޕޯޓުތަކުގެ އަދަދު ހަތަރަކަށް ބަދަލުވެފައިވާ ކަމުގައެވެ. އެ އެއާޕޯޓުތަކަކީ ކުޅުދުއްފުށި އެއާޕޯޓާއި ހަނިމާދޫ އިންޓަނޭޝަނަލް އެއާޕޯޓާއި ފަރެސްމާތޮޑާ އެއާޕޯޓުގެ އިތުރުން ފުވައްމުލައް އެއާޕޯޓު ކަމަށް އާރްއޭސީއެލުން ބުނެއެވެ.
އާރްއޭސީއެލުން ބުނެފައިވަނީ އެ ކުންފުނީގެ ފަރާތުން ހިންގަމުން ގެންދާ އެންމެހާ އެއާޕޯޓުތައް ތަރައްގީކުރުމާއި ދަތުރުވެރިންނަށް ދެވޭ ހިދުމަތްތައް އެއްދުވަހުން އަނެއްދުވަހަށް ފުޅާކުރުމަށް ކެނޑިނޭޅި މަސައްކަތް ކުރަމުންދާ ކަމަށެވެ.
