ރައީސް ސޯލިހު ފޮނުއްވި ސިޓީފުޅުގައި ވަނީ ރާއްޖެއިން ޗައިނާއަށް ކަނޑައަޅާފައި ހުންނަވާ ސަފީރު ބަދަލު ކުރުމާއި ގުޅޭގޮތުން މަޝްވަރާއަކަށް އެދިވަޑައިގެންފަ އެވެ.
މި ސިޓީގައި މައްސަލަ ޖެހިފައި ވަނީ “ޕީޕަލްސް ރިޕަބްލިކް އޮފް ޗައިނާ” ގެ ބަދަލުގައި “ރިޕަބްލިކް އޮފް ޗައިނާ” ޖެހުމުންނެވެ. ރިޕަބްލިކް އޮފް ޗައިނާ އަކީ ޗައިނާގެ ސަރުކާރާއި ވަކިވާން މަސައްކަތް ކުރާ ޓައިވާންގެ ރަސްމީ ނަމެވެ. ޓައިވާން އަކީ މިނިވަސް ދައުލަތެއް ކަމަށް މިހާތަނަށް ރާއްޖެއިން ގަބޫލުކޮށްފަ އެއް ނުވެ އެވެ.
ރާއްޖެއިން މިހާތަނަށް ގަބޫލުކުރަމުން އައީ ޕީޕަލްސް ރިޕަބްލިކް އޮފް ޗައިނާ ނުވަތަ ޗައިނާގެ މައި ސަރުކާރުން ގެންގުޅޭ "ވަން ޗައިނާ" ސިޔާސަތެވެ.
އެހެންކަމުން ރައީސް ސޯލިހު ފޮނުއްވި ސިޓީފުޅުގައި ޖެހިފައިވާ ކުށުގެ ސަބަބުން އެ ސިޓީ މާނަ ކުރެވުނީ ރާއްޖެއިން ޓައިވާނަށް ސަފީރެއް ކަނޑައެޅުމަށް މަޖިލީހުގެ ލަފަޔަކަށް އެދޭ ސިޓީއެއްގެ ގޮތުގަ އެވެ.
މި މައްސަލައިގައި މިހާރު ރާއްޖެއިން ވަނީ ޗައިނާގެ ކިބައިން މާފަށް އެދިފަ އެވެ. އެގޮތުން ޗައިނާއިން ރާއްޖެއަށް ކަނޑައަޅުއްވާފައި ހުންނަވާ ސަފީރު ވެންގް ލިޒިންގް ކުރެއްވި ޓްވީޓެއްގައި ބުނެފައިވަނީ ރާއްޖޭގެ ފޮރިން މިނިސްޓްރީން އެކަން ހިނގާ ދިޔަ ގޮތް އޮޅުންފިލުވައި ދީފައިވާ ކަމަށާއި އަދި އެކަމަށް މާފަށް އެދިފައިވާ ކަަމަށެވެ.
މި މައްސަލަ ފެންމަތިވުމުން ބައެއް ފަރާތްތަކުން ތުހުމަތު ކުރާ ގޮތުގައި މިއީ ސަރުކާރުން ގަސްތުގައި ކުރި ކަމެކެވެ. އެ ފަރާތްތަކުން ބުނާ ގޮތުން ސަރުކާރު ހިންގާ މައި ޕާޓީ، އެމްޑީޕީއަކީ ރާއްޖެއާއި ޗައިނާގެ ގުޅުމަށް މީގެ ކުރިން އެންމެ ފާޑު ކީ ޕާޓީ އެވެ.
