ރައީސް ސޯލިހު މިހެން ވިދާޅުވީ ޗެކް ރިޕަބްލިކުން ރާއްޖެއަށް ކަނޑައެޅުއްވި އާ ސަފީރު، ޑރ. އެލިސްކާ ޒިގޯވާ، އޭނާގެ ސަފީރުކަމުގެ ފަތްކޮޅު ރައީސް ސޯލިހަށް އެރުވުމަށް ރައީސް އޮފީހުގައި މިއަދު ކުރިއަށް ދިޔަ ރަސްމިއްޔާތަށްފަހު ވާހަކަފުޅު ދައްކަވަމުންނެވެ.
ރައީސް ސޯލިހު ވަނީ ޑރ. އެލިސްކާ މަގާމާ ހަވާލުވެ ވަޑައިގަތުމުން އެކަމަށް މަރުހަބާ ވިދާޅުވެފަ އެވެ.
މި ބައްދަލުކުރެއްވުމުގައި ރައީސް ސޯލިހު ވަނީ ރާއްޖެއިން ފޮރިން އިންވެސްޓްމެންޓްތަކަށް އެކި ދާއިރާތަކުން ފުރުސަތުތައް ހުޅުވާލާފައިވާކަން ފާހަގަކުރައްވައި ޗެކް ރިޕަބްލިކަށްވެސް އެ ފުރުސަތު އޮތްކަމަށް ވިދާޅުވެފަ އެވެ.
މޫސުމަށް އަންނަ ބަދަލުތަކާއި، ފަތުރުވެރިކަމާއި، ސިއްހީ ދާއިރާ އަދި ތިމާވެއްޓާއި، މަތީ ތައުލީމުގެ ދާއިރާއިން ގުޅުން ބަދަހިކުރެއްވުމާ ގުޅޭގޮތުންވެސް ދެ ބޭފުޅުން ވަނީ މަޝްވަރާކުރައްވާފައެވެ.
ރައީސް ސޯލިހު ވަނީ ރާއްޖެއާއި ޗެކް ރިޕަބްލިކާއި ދެމެދު އޮތް އެކުވެރިކަމުގެ ގުޅުން ކުރިއަށް އޮތްތާ އިތުރަށް ބަދަހި ކުރުމާ ގުޅޭ ގޮތުން ޑރ. އެލިސްކާއާއި މަޝްވަރާ ކުރައްވާފަ އެވެ. އަދި ކުރިއަށް އޮތްތަނުގައި ދެގައުމުގެ ދެމެދުގައި މިހާރު އޮތް ގުޅުން އިތުރަށް ބަދަހިވާނެ ކަމަށް އުންމީދު ކުރައްވާ ކަމަށްވެސް ރައީސް ސޯލިހު ވިދާޅުވި އެވެ.
މިއަހަރަކީ ރާއްޖެއާއި ޗެކް ރިޕަބްލިކާއި ދެމެދު ސިޔާސީ ގުޅުން ބަދަހި ކުރިތާ 30 އަހަރު ފުރޭ އަހަރުކަން ރައީސް ސޯލިހު ވަނީ ފާހަގަ ކުރައްވާފަ އެވެ.
