މަޖިލީހުގެ މިއަދުގެ ޖަލްސާގައި ބަހުސް ކުރެވެމުން ދިޔަ، އެމްޑީޕީގެ ފުރަތަމަ ސަރުކާރުގައި ދަނޑުވެރިންނަށް ދިން ސަބްސިޑީ އަލުން ދޭން ފެށުމަށް ގޮވާލާ ގަރާރަށް ބަހުސް ކުރުމުގެ މަރުހަލާގައި ހެންވޭރު ހުޅަނގު ދާއިރާގެ މެންބަރު ހަސަން ލަތީފް ވަނީ ރައީސް ނަޝީދަށްް ދިން ބޮމުގެ ހަމަލާގެ ވާހަކަ ދައްކަވާފަ އެވެ.
ހަސަން ވިދާޅުވީ ކެނެރީގޭ ހުންނަ ގޯޅީގައި ސައިކަލެއް ބަހައްޓާ އެ ސައިކަލުގައި ބޮމެއް ހަރުކޮށްގެން ރައީސް ނަޝީދު ނިކުންނަވާ ގަޑީ އެ ބޮން ގޮއްވާލަން އުޅޭ ކަމުގެ މައުލޫމާތު ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހަށް ލިބިވަޑައިގެންފައިވާކަމުގެ މައުލޫމާތު ރައްޔިތުންގެ މަޖިލީހުގެ ސަލާމަތީ ހިދުމަތްތަކާ ބެހޭ ކޮމިޓީ (241 ކޮމިޓީ) އަށް ލިބިފައިވާ ކަމަށެވެ.
މީގެ އިތުރުން މެރީ ބްރައުން ސަރަހައްދުގައާއި ޔާގޫތުގޭ ސަރަހައްދުގައި ބޮމެއް ގޮއްވާލާ ރައީސް ނަޝީދު އަވަހާރަކޮށްލަން އުޅުނުކަމުގެ މައުލޫމާތުވެސް ރައީސް ސޯލިހަށް ލިބުނުކަން 241 ކޮމިޓީއަށް އިނގޭކަމަށް ހަސަން ވިދާޅުވި އެވެ.
ހަސަންގެ ވާހަކަފުޅަށްފަހު މާފަންނު މެދު ދާއިރާގެ މެންބަރު އިބްރާހިމް ރަޝީދު (ބޮންޑޭ) ވާހަކަފުޅު ފައްޓަވަމުން ވިދާޅުވީ އެވާހަކަތައް އަޑު އިވުމުން ވަރަށް ކަންބޮޑުވާކަމަށެވެ. އެފަދަ ވާހަކައެއް އަދި އަޑު ނީވޭ ކަމަށްވެސް ބޮންޑޭ ވިދާޅުވި އެވެ.
ބޮންޑޭގެ ވާހަކަ ހުއްޓަވާލެއްވުމަށްފަހު ރައީސް ނަޝީދު ވިދާޅުވީ އެމަނިކުފާނަށް އެވާހަކަތައް ޔަގީންކޮށްދެވިދާނެ ކަމަށެވެ.
މިއަދުގެ ޖަލްސާގައި ރައީސް ނަޝީދަށް ތާއިދު ކުރައްވާ "ފިކުރެއްގެ ދިރުން" ހަރަކާތުގެ ބައެއް މެންބަރުން ވަނީ މިއީ ސަރުކާރަށާއި ރައީސް ސޯލިހަށް އެނގިގެން ކުރިކަމެއްކަމަށް ތުހުމަތު ކުރައްވާ ވާހަކަފުޅު ދައްކަވާފަ އެވެ.
