ރައީސް ސޯލިހު މިހެން ވިދާޅުވީ ފ. އަތޮޅަށް ކުރައްވަމުން ގެންދަވާ ރަސްމީ ދަތުރުފުޅުގައި ބިލެއްދޫއަށް ވަޑައިގެން އެރަށުގައި ފެނަކައިން އަލަށް ތަރައްގީ ކުރި އިންޖީނުގެ އާއި އޮފީސް އިމާރާތް ހުޅުވުމަށް ބޭއްވި ރަސްމިއްޔާތުގައި ވާހަކަފުޅު ދައްކަވަމުންނެވެ.
ރައީސް ވިދާޅުވީ ބިލެއްދޫގެ ރައްޔިތުންގެ އިހުސާސްތައް އެނގި ވަޑައިގަންނަވާ ކަމަށާއި ރައްޔިތުން އެދޭ ކަންކަން ކޮށްދެއްވުމަށް މަސައްކަތް ކުރައްވަމުން ގެންދަވާ ކަމަށެވެ.
ބިލެއްދޫގެ ބަނދަރު ތަރައްގީ ކުރުމަށް އެމްޓީސީސީއާއި ހަވާލުކޮށްފައިވާކަން ފާހަގަ ކުރައްވަމުން ރައީސް ސޯލިހު ވިދާޅުވީ އެ މަޝްރޫގެ ތެރޭގައި ބިލެއްދޫގެ ބިން ހިއްކުންވެސް ހިމަނަން ނިންމާފައިވާ ކަމަށެވެ.
ބިލެއްދޫގެ ބަނދަރު ތަރައްގީ ކުރުމަށް އެމްޓީސީސީއާއި ހަވާލުކޮށްފައި ވަނީ މިދިޔަ ހަފްތާގެ ތެރޭގަ އެވެ. ބިލެއްދޫ ބަނދަރުގެ މަޝްރޫއަކީ 66.96 މިލިއަން ރުފިޔާއަށް 450 ދުވަހުގެ ތެރޭގައި ނިންމާ ގޮތަށް އެމްޓީސީސީއާއި ހަވާލު ކުރި މަޝްރޫ އެކެވެ.
ފ. އަތޮޅަށް ރައީސް ސޯލިހުގެ ދެކަނބަލުން ކުރައްވަމުން ގެންދަވާ ރަސްމީ ދަތުރުފުޅުގައި އިއްޔެ ވަނީ ދަރަނބޫދޫ، މަގޫދޫ، ނިލަންދޫއަށް ވަޑައިގެންފައެވެ.
