ސަރުކާރުން އަޅާ 50 ވަނަ ދަނޑު ކުރިއަށް އޮތް ދެތިން މަސް ތެރޭ ނިމޭނެ ކަމަށް ވަޒީރު ވިދާޅުވީ ރާއްޖޭގެ ގައުމީ ޓީމުތަކުން މި މަހު ވާދަކުރި ބައިނަލްއަގްވާމީ މުބާރާތްތަކުގައި ހޯދި ކާމިޔާބީ ފާހަގަކޮށް އެ ޓީމްތަކަށް ހިތްވަރު ދެއްވުމަށް ބޭއްވި ބައްދަލުވުމުގައެވެ. އެތްލީޓުންނާ މުހާތަބުކޮށް ވާހަކަ ދައްކަވަމުން މިނިސްޓަރު މަހްލޫފު ވިދާޅުވީ މިހާތަނަށް ގިނަ އަދަދެއްގެ ރަށްތަކެއްގައި ފުޓުބޯޅަ ދަނޑު އެޅިފައިވާއިރު، ގިނަ ރަށްތަކެއްގައި މިހާރުވެސް ދަނީ ދަނޑުގެ އެކި މަސައްކަތްތައް ކުރަމުންނެވެ.
މިހާރު މަސައްކަތް ކުރިޔަށްގެންދާ ހުރިހާ ދަނޑުތައް ނިމުމުން ޖުމްލަ ދަނޑުތަކުގެ އަދަދު 120 އަށްވުރެ ގިނަވާނެ ކަމަށް މަހްލޫފު ވިދާޅުވިއެވެ. އަދި މަހްލޫފް ވިދާޅުވީ ރާއްޖޭގެ އެއްކޮޅުން އަނެއްކޮޅަށް މަތިން ދަތުރު ކުރަމުން ދާއިރު އެންމެ ފުރަތަމަ އަޅައިގަންނާނީ ބޮޑެތި ފުޓުބޯޅަ ދަނޑު ކަމަށާއި މި ސަރުކާރުން ކުރި މަސައްކަތްތައް ކުރިޔަށްއޮތް ޖީލުތަކަށް ފެނިގެންދާނެކަމަށް އުއްމީދުކުރައްވާ ކަމަށެވެ.
ގިނަ ރަށްތަކެއްގައި އަދިވެސް ސަބްބޭސްގެ މަސައްކަތްތައް ކުރިއަށްދާއިރު، މި ދަނޑުތަކުގެ މަސައްކަތް ކުރިޔަށްދަނީ އެ ރަށްތަކުގެ މަޝްވަރާއާއެކުއެވެ.
