އަންނަ ރިޔާސީ އިންތިހާބުގައި ވާދަކުރައްވަން ނިންމަވާފައިވާ ރައްޔިތުންގެ މަޖިލީހުގެ ދަނގެތީ ދާއިރާގެ މެމްބަރުކަންވެސް ކުރައްވާ ނާޒިމް މިހެން ވިދާޅުވީ ޗާގޯސް މައްސަލާގައި އިދިކޮޅު ކޯލިޝަނުން މިރޭ ކާނިވަލުގައި ބޭއްވި ޖަލްސާގެ ދެއްކެވި ވާހަކަފުޅުގައެވެ.
ނާޒިމް ވިދާޅުވީ ރައީސްގެ އިހުމާލުގެ ސަބަބުން ރާއްޖެއިން ބައެއް ގެއްލިއްޖެކަމަށާއި އެބައި ހޯދަންޖެހޭކަމަށާއި އަދި ވެރިކަމުގައި ހުރުމުގެ ހައްގު ރައީސް ސޯލިހަށް މިހާރު ލިބިގެންވެސް ނުވާކަމަށެވެ.
ނާޒިމް ވިދާޅުވީ ޗާގޯސް މައްސަލާގައި ރާއްޖެއަށް ސްވިޒަލޭންޑްވަރުގެ ސަރަހައްދެއް ގެއްލިފައިވާކަމަށާއި އެއީ ގައުމަށް ލިބޭ ވަރަށް ބޮޑު ދެރައެއް ކަމަށެވެ. އެއީ ރައީސް ސޯލިހާ ދެކޮޅަށް ދައުވާކުރަން ޖެހޭކަމެއްކަމަށާއި އެކަން ކުރާނެކަމަށްވެސް ނާޒިމް ވިދާޅުވިއެވެ.
ނާޒިމް ވިދާޅުވީ ރައީސް ސޯލިހްގެ އިހުމާލުން ގައުމުން ބައެއް ގެއްލިގެން ގޮސްފައިވާއިރު، އެއީ މިސަރުކާރު ބަދަލުކުރަންޖެހޭ ސަބަބެއް ކަމަށެވެ. އަދި މިމަސައްކަތް ނިންމާލާނީ ރައީސް ސޯލިހުގެ ވެރިކަން ނިމުމަކަށް ގެނެސްފައިކަމަށްވެސް ނާޒިމް ވިދާޅުވިއެވެ.
މިއީ ފެއިލްވާނެ އެންމެ ބޮޑަކަށް ފެއިލްވެފައި އޮތް ސަރުކާރެއްކަމަށާއި މި ވެރިކަން ބަދަލުކުރަން ފަސްޖެހިގެންވެސް ނުވާނެކަމަށް ނާޒިމް މިރޭ ވިދާޅުވިއެވެ.
