ޔޫރޮޕާ ލީގުގެ ފައިނަލް މެޗަށްފަހު މޮރީނިއޯ ވަނީ ރެފްރީންގެ ނިންމުންތަކާއި މެދު ހިތްހަމަ ނުޖެހި، ސްޓޭޑިއަމްގެ ޕާކިން ލޮޓުގައި ރެފްރީންނާއި ހަޑިހުތުރު ބަހުން މުހާތަބު ކޮށްފައެވެ. މީގެ އިތުރުން، އޭނާ ވަނީ މީޑިއާއަށް ދިން އިންޓަވިއުއެއްގައިވެސް މެޗުގެ ރެފްރީ އެންތަނީ ޓޭލާއަށް ވަރަށް ބޮޑަށް ފާޑުކިޔާފައެވެ.
މިކަމާއި ގުޅިގެން ޔުއެފާއިން އަންނަނީ މޮރީނިއޯގެ މި މައްސަލަ ބަލަމުންނެވެ. މޮރީނިއޯގެ މި މައްސަލާގެ އިތުރުން، ޔުއެފާއިން އަންނަނީ މޮރީނިއޯ ކޯޗުކޮށްދޭ ރޯމާގެ ހަ ޑިސިޕްލިނަރީ މައްސަލައެއްވެސް ބަލަމުންނެވެ. އަދި ޔުއެފާގެ ކޮންޓްރޯލް، އެތިކްސް އެންޑް ޑިސިޕްލިނަރީ ބޮޑީއިން ވަރަށް އަވަހަށް މި މައްސަލަ ބަލާ، ފިޔަވަޅު އަޅާނެ ކަމަށްވެސް ރިޕޯޓުތައް ބުނެއެވެ.
މޮރީނިއޯގެ ފަރާތުން ފެނުނު މި އަމަލާއި ގުޅިގެން އޭނާއަށް ހަރުކަށި އަދަބެއް ދިނުމަކީ ވަރަށް އެކަށިގެންވާ ކަމެއް ކަމަށްވެސް ބޭރުގެ މީޑިއާތަކުގައި ރިޕޯޓު ކޮށްފައިވެއެވެ.
