ގައުމީ ޝިޕިން ލައިން، އެމްއެސްއެސްއަށް އާ ބޯޓެއް ގެނައުމަށް ނިންމާފައިވާކަން އިއުލާނު ކުރެއްވީ، އައްޑޫ ސިޓީ ބިން ހިއްކުމުގެ މަޝްރޫއު ރަސްމީކޮށް ފެށުން ފާހަގަކުރުމަށް އިއްޔެ ހަވީރު ބޭއްވި ރަސްމިއްޔާތުގައި ރައީސުލްޖުމްހޫރިއްޔާ އިބްރާހީމް މުހައްމަދު ސޯލިހެވެ.
ރައީސް ވިދާޅުވީ ކޮވިޑުގައި ދުނިޔެ ހުއްޓުނު ވަގުތު، އަލަށް އުފެއްދި ސަރުކާރުގެ އާގުބޯޓު ކުންފުނި ދުއްވައި ގަތް ކަމަށާއި ސުމަކުން ފެށި ނަމަވެސް، މިއަދު އެ ކުންފުނީގައި އަމިއްލަ ތިން އާގު ބޯޓު އެބައޮތް ކަމަށެވެ. އިތުރު ބޯޓެއް އަންނަ ޖުލައި މަހު އެ ކުންފުންޏަށް އިތުރުވާނެ ކަމަށް ރައީސް ވިދާޅުވިއެވެ.
އެމްއެސްއެސްއަށް ގެނައުމަށް ނިންމާފައިވާ ބޯޓާ ގުޅޭގޮތުން އެ ކުންފުނީގެ މެނޭޖިން ޑިރެކްޓަރު މުހައްމަދު ނާޒިމް ވިދާޅުވެފައިވަނީ 15،000 މެޓްރިކް ޓަނުގެ މުދާ އުފުލޭ ޖާގައިގެ އެ ބޯޓު އަންނަ ޖުލައި މަހުގެ މެދެއްހާ ހިސާބުގައި ރާއްޖެއަށް ގެނެވޭނެ ކަމަށެވެ.
އެ ބޯޓުގައި ސަތޭކަ ވަރަކަށް ކޮންޓެއިނަރު އުފުލޭނެ ކަމަށް ނާޒިމް ވިދާޅުވިއެވެ. ބޯޓުގެ ދަތުރުތައް ކުރާނީ މާލެ އާއި ކޫއްޑޫ އަދި އައްޑޫ އާ ދެމެދު ކަމަށް ނާޒިމް ވިދާޅުވިއެވެ.
ނާޒިމް ވިދާޅުވި ގޮތުގައި އިންޑިއާގައި ދުއްވަމުންދާ އެ ބޯޓު ގަތުމަށް ފައިސާ ދައްކައި ނިންމާފައިވާ ކަމުގައެވެ. އެ ބޯޓަކީ ދުއްވާތާ އަށް އަހަރު ވެފައިވާ ބޯޓެއް ކަމަށާއި ބޯޓުގެ ހާލަތު ރަނގަޅު ކަމަށް ނާޒިމް ވިދާޅުވިއެވެ.
