ރިފްއަތު މިހެން ވިދާޅުވީ ރައްޔިތުންގެ މަޖިލީހުގެ މިއަދުގެ ޖަލްސާގައި ކުރިއަށް ދިޔަ ބަންޑާރަ ނައިބުގެ އިތުބާރު ނެތްކަމުގެ މައްސަލައިގެ ބަހުސްގައި ޖަވާބުދާރީވުމަށް ލިބުނު ފުރުސަތުގަ އެވެ.
ރިފްއަތު ވިދާޅުވީ ކަނޑުގެ ސަރަހައްދުގެ މައްސަލައިގައި ކުރީގެ އެއްވެސް ސަރުކާރަކުން ދިވެހިންގެ ހައްގުގައި ގޮތެއް ނިންމަން ނުކެރުނު ކަމަށެވެ.
ދެކުނު އީއީޒެޑުގެ މައްސަލައިގައި ކުރީގެ ބަންޑާރަ ނައިބުން އިންތިހާއަށް އިހުމާލުވެފައިވާކަމަށާއި އެކަން ވަރަށް ލަދުވެތިކަމާއެކު ފާހަގަ ކުރާ ކަމަށް ރިފްއަތު ވިދާޅުވި އެވެ.
ރިފްއަތު ވިދާޅުވީ އިޓްލޮސްގައި މި މައްސަލަ ކުރިއަށް ގެންދިއުމުގެ ފުރުސަތު މޮރިޝަސްއަށް ލިބިގެން ދިޔައީ ކުރީގެ ސަރުކާރުތަކުން މި މައްސަލަ ހައްލުކޮށްފައި ނުވުމުން ކަމަށެވެ.
މީގެ އިތުރުން ރާއްޖެއާއި ޗާގޯސް އާއި ދެމެދު ފުށުއަރާ ކަނޑުގެ ސަރަހައްދު ކަނޑައެޅުމުގެ މައްސަލައިގައި އިސް ކުރައްވާފައިވާނީ ދިވެހި ދައުލަތުގެ އެންމެ މަތީ މަސްލަހަތު ކަމަށްވެސް ރިފްއަތު ވަނީ ވިދާޅުވެފަ އެވެ.
ކަނޑުގެ މައްސަލައިގައި ކުރީގެ ބަންޑާރަ ނައިބުންގެ އިހުމާލު އޮތްކަމަށް ރިއްފަތު ވިދާޅުވި އިރު ކަނޑުގެ ސަރަހައްދު ވިއްކާލާފައިވާ ކަމަށާއި ކަނޑުގެ ސަރަހައްދު ބެހުމުގައި ދިވެހިންގެ މަސްލަހަތަށް ބަލާފައި ނުވާކަމަށް ބުނެ ކުރީގެ ދެ ބަންޑާރަ ނައިބުން ކަމަށްވާ ޑރ. މުހައްމަދު މުނައްވަރު އާއި އާއިޝަތު އާޒިމާ ޝަކޫރު އަންނަނީ ހިޔާލު ފާޅު ކުރައްވަމުންނެވެ.
