ރައީސް އޮފީހުގައި މިއަދު ކުރިއަށް ދިޔަ ނޫސްވެރިންގެ ބައްދަލުވުމުގައި ރައީސް އޮފީހުގެ ތަރުޖަމާނު މިއުވާން މުހައްމަދު ވިދާޅުވީ 241 ކޮމިޓީން އެދިއްޖެ ހާލަތެއްގައި ސިޓީފުޅު އެ ކޮމިޓީއާއި ހިއްސާ ކުރައްވާނެ ކަމަށާއި ނަމަވެސް ދުނިޔޭގެ އެއްވެސް ތަނެއްގައި މިފަދަ ސިޓީފުޅުތަކަކީ އާންމު ކުރާ އެއްޗެއް ނޫން ކަމަށެވެ.
މިއުވާން ވިދާޅުވީ ދެ ގައުމުގެ ވެރިންގެ ދެމެދުގައި ބަދަލު ކުރެވޭ ސިޓީފުޅުތަކަކީ ރާއްޖޭގައިވެސް މީގެ ކުރިން އާންމު ކުރާ ލިޔެކިޔުންތަކެއް ނޫން ކަމަށެވެ.
ރައީސް މޮރިޝަސްގެ ސަރުކާރަށް ފޮނުއްވި ސިޓީފުޅުގެ ވާހަކަ ދައްކަވާ ބައެއް ބޭފުޅުން އެ ވާހަކަ ދައްކަނީ ސިޔާސީ ބޭނުމަކަށް ކަމަށާއި އެމީހުން ބޭނުންވަނީ ދެ ގައުމުގެ ވެރިންގެ ދެމެދުގައި ބަދަލު ކުރެވޭ ސިޓީއަކީ އާންމު ކުރާ އެއްޗެއްކަން ދެއްކުމަށް ކަމަށެވެ.
ރައްޔިތުންގެ މަޖިލީހުގެ އިދާރާގައި އަންގާރަ ދުވަހު އެމްޑީޕީގެ ޕީޖީން ބޭއްވި ނޫސްވެރިންގެ ބައްދަލުވުމެއްގައި ވާހަކަފުޅު ދައްކަވަމުން 241 ކޮމިޓީގެ މުގައްރިރު އަދި އައްޑޫ ހިތަދޫ ދާއިރާގެ މެންބަރު މުހައްމަދު އަސްލަމް ވިދާޅުވީ މިވަގުތު ކޮމިޓީތަކުގެ މަސައްކަތްތައް ހުއްޓިފައި އޮތްނަމަވެސް ކޮމިޓީތައް އަލުން އެކުލަވާލާ ނިމޭ އިރު އޭނާ 241 ކޮމިޓީގެ މުގައްރިރަކަށް ހުރެއްޖެ ނަމަ ރައީސްގެ ސިޓީފުޅު ހޯދަން ގަސްތު ކުރައްވާ ކަމަށެވެ.
