ޖުމްހޫރީ ޕާޓީގެ ލީޑަރުގެ އެޑްވައިޒަރު ވިލިފުށީ ދާއިރާގެ ކުރީގެ މެމްބަރު ރިޔާޒް ރަޝީދު ވިދާޅުވީ ޖަލްސާ ފަށާފައިވަނީ ކުރިން ވެސް ރާވާފައި އޮތް ވަގުތުގައި ކަމަށެވެ.
އެގޮތުން ޖަލްސާގެ އެކިއެކި ފަރާތްތަކަށް ދައުވަތު ދިނީ އެކި ވަގުތުތަކުގައި ކަމަށާއި، ޖަލްސާގެ ބައިވެރިންނަށް 8 ޖަހާއިރު އައުމަށް ދައުވަތު ދިން ކަމަށާއި, ޕާޓީގެ ކައުންސިލް މެންބަރުންނަށް 9:15އަށް ދައުވަތު ދެވުނު ކަމަށާއި ޕާޓީގެ ލީޑަރަށް ދައުވަތު ދެވުނީ 9:40ގައި ކަމަށް ރިޔާޒް ރަޝީދު ވިދާޅުވިއެވެ.
އަދި ޖަލްސާ ފަށަން ކުރިން ވެސް ކަނޑައެޅި ގަޑިއަކީ 9:45ކަމަށް ރިޔާޒް ވިދާޅުވިއެވެ. ރިޔާޒް ވިދާޅުވީ, ޖަލްސާ ފެށުމުގެ ކުރިން އޮތީ ހަބޭސް ބޮޑުބެރުގެ ހުށަހެޅުންތަކެއް ކަމަށެވެ.
އެރޭގެ ޖަލްސާއަށް ފަހު ޖޭޕީން ބުނެފައިވަނީ ކުރިއަށް އޮތް ރިޔާސީ އިންތިހާބުގައި އެއްވެސް ބަޔަކާއި ކޯލިޝަން ނުހަދާނެ ކަމަށާއި އިންތިހާބުގައި ވާދަކުރާނީ އެކަނި ކަމަށް ބުނެފައެވެ. އެހެންނަމަ ވެސް ސަރުކާރުގެ އެކިއެކި ސިޔާސީ މަގާމް ތަކުގައި ޖުމްހޫރީ ޕާޓީގެ މެމްބަރުން ތިބުމަކީ ހަމަޖެހޭ ކަމެއްނޫންކަމުގައި ވެރިކަންކުރާ އެމްޑީޕީގެ މެމްބަރުން ދަނީ ބުނަމުންނެވެ.
ކާނިވާ ސަރަހައްދުގައި އޮތް ޖަލްސާ ނުފެށި އެހާ ބޮޑަށް ލަސްވީ، ކާނިވަލަށް ޖަމާވި މީހުންގެ އަދަދު މަދުވެގެން ކަމަށް ބައެއް ނޫސްތަކުން ރިޕޯޓުކޮށްފައިވެއެވެ. އަދި ކާނިވާ ސަރަހައްދުގައި ޖަހާފައި ހުރި ގިނަ އަދަދެއްގެ ގޮނޑިތައް ނެގި މަންޒަރު ފެންނަ ވީޑިއޯތަކެއް ވެސް ސޯޝަލް މީޑިއާގައި ދައުރުވިއެވެ.
