ކްރިސްޓިއާނޯ ރޮނާލްޑޯއާ ކުނި ޖެހި، އަލް ނަސްރުގެ ކޯޗު ކަމުގެ މަގާމުން ގާސިއާ ވަކިކުރީ، މިދިޔަ އޭޕްރީލް މަހުއެވެ. އޭގެ ފަހުން ގާސިއާ ހުރީ ވަޒީފާއެއް ނެތިއެވެ. އެހެން ހުއްޓާ، ނަޕޯލީން ލިބުނު ފުރުސަތުގައި އެ ޓީމާ ހަވާލުވީއެވެ.
ނަޕޯލީގެ ކޯޗުކަމުގެ މަގާމު ހުސްވީ، ނަޕޯލީ އަށް 33 އަހަރު ފަހުން އިޓާލިއަން ސެރީ އޭ ކާމިޔާބު ކޮށްދިނުމަށް ފަހު ކޯޗު ލޫސިއާނޯ ސްޕަލޭޓީ އަރާމު ކުރަން ވަގުތު ހޯދަން ކަމަށް ބުނެ ޓީމު ދޫކޮށްލުމުންނެވެ.
ނަސްރަށް ކޯޗު ކޮށްދިނުމުގެ ކުރިން ގާސިއާ ވަނީ ފްރާންސްގެ ލިޔޯން އާއި މާސޭގެ އިތުރުން އިޓަލީގެ އޭއެސް ރޯމާ އަށް ވެސް ކޯޗު ކޮށްދީފަ އެވެ. އޭނާ ވަނީ 2017/2018 ސީޒަންގެ ޔޫރޮޕާ ލީގު ފައިނަލަށް މާސޭ ގެންގޮސްދީފަ އެވެ. ކޯޗެއްގެ ގޮތުގައި ގާސިއާގެ އެންމެ ކާމިޔާބު ދުވަސްވަރު ހޭދަކުރީ ރޯމާ އަށް ކޯޗު ކޮށްދިނުމުގެ ކުރިން ފްރާންސްގެ ލިލް އާއެކު އެވެ. ލިލް އާއެކު ފަސް ސީޒަން ހޭދަކުރި އިރު އޭނާ ވަނީ 2010/2011 ސީޒަންގައި އެޓީމަށް ފްރެންޗް ލީގާއި ފްރެންޗް ކަޕް ކާމިޔާބު ކޮށްދީފަ އެވެ.
