މިދިޔަ ސެޕްޓެމްބަރު މަހު އޮލިމްޕަހުގައި ދެއްކި ފިލްމު މީޑިއާނެޓްގެ ސްޓްރީމިން ޕްލެޓްފޯމް އެމްއެސް ވީޑިއޯ ކުލަބުގައި ޕްރީމިއާކުރީ ބުރާސްފަތީގައެވެ.
ކުޑަކުދިން ހެއްވާލާ އެ ކުދިންނަށް އުފާވެރިކަން ގެނުވާ ދިވެހި ކެރެކްޓަރު "ރޯބޯމޭން"އަށް ހާއްސަކޮށްގެން އޯކޭޒްއިންކްގެ އުފެއްދި މި ފިލްމު ސިނަމާތަކުގައި އެޅުވީ ސެޕްޓެމްބަރު މަހު 26 ގައެވެ. ފިލްމުގެ ހައުސްފުލް ޝޯތަކެއް އޮލިމްޕަހުގައި ދެއްކުމަށް ފަހު ޝްވެކް ސިނަމާގައިވެސް ވަނީ ދައްކާފައެވެ. މީގެއިތުރުން ބައެއް ރަށްރަށުގައިވެސް ރޮބޯމޭން ޝޯތައް ވަނީ ދައްކާފައެވެ.
ރޮބޯމޭންއަކީ މީގެ އަށެއްކަ އަހަރު ކުރިން ކުޑަކުދިންގެ ހަފުލާތަކާއި މުނިފޫހިފިލުވުމުގެ އެކި އިވެންޓުތަކުން އާންމުންނަށް ފެންނަން ފެށި ކެރެކްޓާއެކެވެ. މޫނު ފޮރުވަން އަޅި ކުލައިގެ ހާއްސަ މާސްކެއް އަޅައިގެން ހުންނަ ރޮބޯމޭންއަކީ އަސްލު ކާކު ކަމެއް ނޭނގެއެވެ.
ކުޑަކުދިން ވަރަށް ޝައުގުވެރިވާ ވާނެ ގޮތަށް ގެނެސްދޭ މި ފިކްޝަނަލް އަދި ޓައިމް ޓްރެވަލް ފިލްމުގައި ދެ ޒަމާނެއް ދައްކަ އެވެ. އެއީ މި އަހަރާއި 2040 ވަނަ އަހަރު ހިނގާ ކަންތައްތަކެކެވެ. މުޅި ވާހަކަ ބިނާވަނީ "ދަ ރޮބޯ ޖޫނިއާ ޗެލެންޖު" ކިޔާ ކުޑަކުދިންގެ ނެށުމުގެ މުބާރާތެއްގައި ބައިވެރިވާ ކުދިންތަކެއް މެދުގައި ހިނގާ ކަންތައްތަކެއްގެ މައްޗަށެވެ.
މި ފިލްމުގެ ކާސްޓުގައި ވެސް ވަރަށް ގިނަ ކުޑަކުދިން ހިމެނެ އެވެ.
