މިރޭ ރާއްޖެއާއި ނޭޕާލް ބައްދަލުކުރި މެޗަށް ނުކުތް އިރުވެސް ރާއްޖެއަށް ވަނީ މުބާރާތުގައި އިތުރަށް ކުރިއަށް ދިއުމުގެ ފުރުސަތު ގެއްލިފައެވެ. އެއީ ނޭޕާލުން އިއްޔެ ބަނގްލަދޭޝާއި ބައްދަލުކުރި މެޗު ކާމިޔާބު ކުރުމުންނެވެ. 

ނޭޕާލާއި ރާއްޖެ ބައްދަލުކުރި މެޗު ނޭޕާލުން ކާމިޔާބުކުރީ 68-75 ންނެވެ. މި މެޗުން ބަލިވުމާއެކު ރާއްޖެއިން މުބާރާތް ނިންމާލަން ޖެހުނީ އެއްވެސް މެޗަކުން މޮޅެއް ނުލިބިއެވެ. 

މި މުބާރާތުގައި ބައިވެރިވީ ފަސް ޓީމެވެ. ރާއްޖެއާއި ނޭޕާލުގެ އިތުރުން މުބާރާތުގައި ވާދަކުރަނީ ބަނގްލަދޭޝް، ޕާކިސްތާން އަދި ބޫޓާނެވެ. މުބާރާތުގެ ސެމީ ފައިނަލުން ޖާގަ ލިބޭނީ ލީގު ބުރުގައި އެންމެ ރަނގަޅު ނަތީޖާ ނެރޭ ހަތަރު ޓީމަށެވެ. 

މި މުބާރާތާއި ކުރިމަތިލިއިރު، ރާއްޖޭގެ އަމާޒަކީ މިފަހަރުގެ މުބާރާތުގެ ތަށި ކާމިޔާބު ކުރުމެވެ. މުބާރާތަށް ތައްޔާރު ވުމުގެ ގޮތުން ރާއްޖޭގެ ބާސްކެޓްބޯޅަ ޓީމުން ވަނީ އިންޑިއާގެ ބެންގަލޫރުގައި ހުންނަ ޕަޑުކޯން ޑްރާވިޑް ސެންޓާ ފޯ ސްޕޯޓްސް އެކްސަލަންސް ހައި ޕާފޯމަންސް ސެންޓަރުގައި ދެ ހަފްތާގެ ތަމްރީނުތަކެއް ކުރިއަށް ގެންގޮސްފައެވެ.