
ދިރާގު ރޯޑް ރޭހުގެ ރަސްމީ ރޭސް ކިޓްގެ ތެރޭގައި ރޭސް ނިންމާ ވަގުތު ދެނެގަނެވޭ ޗިޕް އެކުލެވޭ ބިބް އަދި ދުވުންތެރިންނަށް ހާއްސަ ޓީޝާޓާއި އަދި ކޮންމެހެން ބޭނުންވާ ތަކެތި ގެންދިއުމަށް ރޭސް ދަބަހެއް ހިމެނެ އެވެ. މި ރޭސް ނިންމާ ކޮންމެ ދުވުންތެރިއަކަށް ދިރާގު ރޯޑް ރޭހަށް ހާއްސަކޮށް ފަރުމާކޮށްފައިވާ މެޑަލް އެއް ލިބޭނެ އެވެ. މި މެޑަލް ވެސް ރޭސް ކިޓާއި އެކު ދިރާގުން ވަނީ ދައްކާލައިފަ އެވެ.
ދިރާގު މޯލްޑިވްސް ރޯޑް ރޭހަކީ ވޯލްޑް އެތުލެޓިކްސް ސަޓިފައިޑް ރޭސް ރޫޓަކާ އެކު، އެސޯސިއޭޝަން އޮފް އިންޓަނޭޝަނަލް މެރަތަންސް އެންޑް ޑިސްޓަންސް ރޭސަސް (އެއިމްސް) ވޯލްޑް ރަނިން ކަލަންޑަރުގައި ލިސްޓު ކޮށްގެން ރާއްޖޭގައި ބާއްވާ ހަމައެކަނި ބައިނަލްއަގްވާމީ ދުވުމެވެ. މި ދުވުން މިއަހަރު އޮންނާނީ އަންނަ އޮކްޓޫބަރު 24 ވަނަ ދުވަހު ހުޅުމާލެ ސެންޓްރަލް ޕާކުގަ އެވެ.
ޑީއެމްއާރްއާރް 2025 އަށް ރަޖިސްޓްރީ ކުރުމުގެ ފުރުސަތު މިހާރު ހުޅުވާލާފައިވާއިރު، 4،000 ބައިވެރިން ހަމަވުމުން އެ ފުރުސަތު ބަންދުކުރާނެ ކަމަށް ދިރާގުން ވަނީ ބުނެފަ އެވެ. މި ރޭހުގެ އިތުރު މައުލޫމާތު ރޯޑް ރޭސް ވެބްސައިޓުން ލިބޭނެ އެވެ.
ކޮންމެ އަހަރަކުވެސް މި އިވެންޓަކީ އެއްބައިވަންތަކަމާއި ދުޅަހެޔޮ ދިރިއުޅުމެއް އުޅުމުގެ ރޫހެއް އުފެއްދުމުގެ އިތުރުން މުހިންމު އިޖުތިމާއީ ކަންކަމަށް ހޭލުންތެރިކަން ގެނެސްދޭ އިވެންޓެކެވެ.