ޑީޖޭއޭ އިން މިއަދު ނެރުނު ސާކިއުލާއެއްގައި ވަނީ، ޝަރުއީ ދާއިރާގެ މުވައްޒަފުންގެ ގަވައިދުގައި ހެދުން އެޅުމާ ގުޅޭ ގޮތުން އޮތް މާއްދާ އަލުން އެކުލަވައިލައި އާންމުކޮށްފައިވާ ކަމަށް ބުނެފަ އެވެ.
އެ މާއްދާއަށް ގެނައި އިސްލާހާ އެއްގޮތަށް މިއަދުން ފެށިގެން ކޯޓުތަކާއި އިދާރާތަކުން އަމަލުކުރަމުން ގެންދިޔުމަށް ޑީޖޭއޭއިން ވަނީ އެދިފަ އެވެ.
މިއަދު ގެނައި އިސްލާހުގައި ވަނީ "މި މާއްދާގައު މިހެން އޮތް ނަމަވެސް، ޝަރުއީ ދާއިރާގައި މަސައްކަތް ކުރާ އަންހެން މުވައްޒަފުން މޫނު ބުރުގާ (ލޯ ނުފޮރުވޭ ގޮތަށް) އެޅުން މި މާއްދާގެ (ހ) އިން ހުރަހެއް ނާޅާ" ކަމަށެވެ.
އެހެން ނަމަވެސް މަސައްކަތުގެ މާހައުލުގެ ތެރެއިން މިފަދަ ހެދުން އަޅާ މުވައްޒަފުންނަކީ ކާކުކަން، ކަށަވަރުނުވެއްޖެނަމަ، އެފަދަ މުވައްޒަފެއްގެ މޫނު ކޯޓު ނުވަތަ އިދާރާގެ ކަމާބެހޭ އަންހެން މުވައްޒަފަކަށް ދައްކަން ވާނެ ކަމަށް އިސްހާލުގައި ވެއެވެ.
މީގެ ކުރިން ޝަރުއީ ދާއިރާގައި މަސައްކަތް ކުރާ އަންހެން މުވައްޒަފުންނަށް މޫނު ބުރުގާ އަޅައިގެން މަސައްކަތް ކުރުމުގެ ފުރުސަތު އޮތީ ހަނިވެފަ އެވެ. މިގޮތުން މީގެ ކުރިން މިފަދަ ކަންކަމުގައި ވަޒީފާއިންވެސް ވަކިކޮށްފައި ވެއެވެ. އަދި ވަޒީފާ ދިނުންވެސް ހުއްޓުވާފައި ވެއެވެ.
މީގެ ކުރިން މުދައްރިއްސުންނަށް ވެސް މޫނު ބުރުގާ އަޅައިގެން ކިޔަވައިގެން ނުދެނެވޭ ގޮތަށް އުސޫލެއް އޮތް ނަމަވެސް، އެކަމާ ގުޅޭ ގޮތުން ގިނަ ބަޔަކު ނުރުހުން ފާޅުކުރުމުން، އެ އުސޫލު ވަނީ ބަދަލުކޮށްފަ އެވެ.
