ރައްޔިތުންގެ މަޖިލީހުގެ އިދާރާގައި މިއަދު ބޭއްވި ނޫސްވެރިންގެ ބައްދަލުވުމެއްގައި ވާހަކަފުޅު ދައްކަވަމުން ރައީސް ނަޝީދު ވިދާޅުވީ މުރައިދޫގޭގައި ހުރުމަކީ އެއްގޮތަކަށްވެސް ކުރާ ހިތްވާ ކަމެއް ނޫން ކަމަށެވެ.
ރައީސް ނަޝީދު މިވާހަކަތައް ދެއްކެވީ ރައްޔިތުންގެ މަޖިލީހުގެ ރިޔާސަތަގައި އިންނަވަން އެމަނިކުފާނު އުޒުރުވެރިވާއިރު މަޖިލީހުގެ ރައީސް ކަމުގައި ހުންނާތީ ލިބޭ އިނާޔަތްތައް ބޭނުން ކުރައްވާނަންތޯ ނޫސްވެރިއަކު ސުވާލު ކުރުމުންނެވެ.
އެމަނިކުފާނަކީ މާތް ﷲގެ އިރާދަފުޅުން މާލޭގައި ގޯތި ގެދޮރު ނެތިގެން މާލޭގައި ދިރިއުޅޭނެ ގޮތެއް ނެތިފައި ހުރި މީހެއް ނޫން ކަމަށް ރައީސް ނަޝީދު ވިދާޅުވި އެވެ.
އެމަނިކުފާނުގެ އަމިއްލަ ގެކޮޅަށް ބަދަލުވާނެ ގޮތެއް ހޯދުމަކީ އެމަނިކުފާނުވެސް ވަރަށް ކުރައްވަން ބޭނުންފުޅުވާ ކަމެއްގެ ގޮތުގައި ރައީސް ނަޝީދު ސިފަ ކުރެއްވި އެވެ.
މީގެ އިތުރުން ރައްޔިތުންގެ މަޖިލީހުގެ ރައީސްގެ ހައިސިއްޔަތުން އެމަނިކުފާނަށް ލިބޭ ސެކިއުރިޓީ ހުއްޓާލައިގެން އެމަނިފާނު މަރާލައިފިއްޔާ އޮންނާނީ މަރުވެފައި ކަމަށެވެ.
ބޮމެއް ގޮއްވާލާ ރައީސް ނަޝީދު އަވަހާރަކޮށްލުމަށް ދިން ހަމަލާއަށް އިޝާރާތް ކުރައްވާ ރައީސް ނަޝީދު ވިދާޅުވީ މިހާރުވެސް އެމަނިކުފާނު މަރު ނުވެ ހުރީ ކިރިޔާ ކަމަށެވެ.
