ރައީސް އޮފީހުގެ ތަރުޖަމާން މިއުވާން މުހައްމަދު
ވަކި ލިސްޓަކަށް ބޯހިޔާވަހިކަން ދިނުމުގެ ކަންކަން ނުހިނގާނެ: ސަރުކާރު
22 ޖޫން 2023 - 11:38:27
މި ސަރުކާރުން ކުރިއަށް ގެންދާ ބޯހިޔާވަހިކަމުގެ މަޝްރޫއުތަކުގައި ވަކި ލިސްޓަކަށް ބޯހިޔާވަހިކަން ބާހާނުލާނެކަމަށާއި އެކަމުގެ ޔަގީންކަން ސަރުކާރުން ދޭކަމަށް ރައީސް އޮފީހުގެ ތަރުޖަމާނު މިއުވާން މުހައްމަދު ވިދާޅުވެއްޖެ އެވެ.
މިއުވާން މިހެން ވިދާޅުވީ މާލޭ ސަރަހައްދުން ގޯތި ދިނުމާއި ފްލެޓް ދިނުމުގެ ކަންކަމުގައި މަޖިލިސް މެމްބަރުންނާއި ސަރުކާރުގެ ވެރިންގެ ނުފޫޒު ގަދަކަމަށް ބުނާ މައްސަލައަށް މިއަދު ދެއްވި ޖަވާބުގައެވެ.
މަޖިލިސް މެމްބަރުން ބޭނުންވާ ދިހަ ފަރާތަކަށް ފްލެޓް އަދި ގޯތި ދިނުމަށް ރާވަމުން ގެންދާކަމަށާއި ލިސްޓްތައް އެކުލަވާލާފައިވަނީ އެގޮތަށް ކަމަށް ބުނެ ބައެއް މީޑިއާ ތަކުގައިވެސް ވަނީ ރިޕޯޓް ކޮށްފައެވެ.
ރައީސް އޮފީހުގައި މިއަދު ބޭއްވި ނޫސްވެރިންގެ ބައްދަލުވުމުގައި މިއުވާން ވަނީ އެ ތުހުމަތުތައް ދޮގު ކުރައްވާފައެވެ.
"ބޯހިޔާވަހިކަމުގެ ސިޔާސަތުގެ ދަށުން ބޯހިޔާވަހިކަން ލިބޭ ފަރާތްތައް ކަށަވަރުވެގެން ދާއިރު އެކަމާއި ގުޅޭގޮތުން، މާގިނަ ސުވާލު އުފައްދާނެ ފުރުސަތެއް ނޯންނާނެކަމަށް، އެހެން ވީމަ ވަކި ފަރާތެއް ދީގެން އޮންނަ ވަކި ލިސްޓަކަށް ބޯހިޔާވަހިކަން ދިނުމާ މިކަހަލަ އެއްވެސް ކަމެއް ނުހިނގާނެކަމުގެ ޔަގީންކަން އަޅުގަނޑު މިހާރުވެސް ތިބޭފުޅުންނަށް އަރުވަން" - މިއުވާން
ތަރުޖަމާނު މިހެން ވިދާޅުވިއިރު ސަރުކާރުގެ ވައުދުގެ ތެރޭގައި ހިމެނޭ ބޯހިޔާވަހިކަމުގެ ސިޔާސަތުގެ ދަށުން ގޯއްޗާއި ފްލެޓް ލިބުނު މީހުން ވަގުތީ ލިސްޓް އަންނަ ހަފްތާގައި އިއުލާން ކުރާނެކަން ހައުސިން މިނިސްޓްރީން މިއަދު ވަނީ ބުނެފައެވެ.
0%
ކަމުގޮސްފި
0%
އަޑުއެހިތާ މިހުރީ
0%
ސަތޭކައަކުން ސުމެއް
0%
ވަރަށް ސަލާމް
ކޮމެންޓްސް
