ސާފް ޗެމްޕިއަންޝިޕް ފުޓްބޯޅަ މުބާރާތުގައި ކުޅޭ އެންމެ މޮޅު ކުޅުންތެރިއަކީ ސުނިލް ޗެތްރީއޭ ބުނުމުން އެކަން މިއަދު މާ ބޮޑު ބަހުސަކަށް ނުވިނަމަވެސް ރާއްޖޭގެ އެންމެ މޮޅު ކުޅުންތެރިޔާ އަލީ އަޝްފާގު މި މުބާރާތުގައި ކުޅޭނަމަ، މި ދެންނެވި ސުވާލުގެ ޖަވާބު ތަފާތުވުމުގެ ފުރުސަތު އެބައޮތެވެ. 

ޗެތްރީއަކީ 2021 ވަނަ އަހަރު ރާއްޖޭގައި އޮތް ސާފް ޗެމްޕިއަންޝިޕް ހޯދި ކެޕްޓަނެެވެ. މުބާރާތުގެ މޮޅު ކުޅުންތެރިޔާގެ އިތުރުން ރަން ބޫޓުވެސް މާލޭގައި ހޯދީ ދަގަނޑޭވެސް ކުޅުނު މި މުބާރާތުގައި ޗެތްރީއެވެ. 

އޭގެ ދެ އަހަރު ފަހުން އަނެއްކާވެސް ސާފް ޗެމްޕިއަންޝިޕް ފެށިގެން ކުރިއަށްދާއިރު މިއަދު ދިވެހި ޓީމުގައި ދަގަނޑޭއެއް ނެތެވެ. އަނިޔާވެ ޓީމުން ފުރުސަތު ގެއްލުނުއިރު ޗެތްރީ އަކީ މިއަދުވެސް އިންޑިޔާ ޓީމު ކެޕްޓަނެވެ. މުބާރާތުގެ ފުރަތަަމަ މެޗުގައި ހެދި ހެޓްރިކާއެކު، އުމުރުން 38 އަހަރަސް އަދިވެސް އޭނާގެ ފެންވަރު ތަފާތުކަން އޭނާ ދައްކައިދިނެވެ. 

ދަގަނޑޭ މި ފަހަރުގެ މުބާރާތުގައި ނެތް ނަމަވެސް މި ވަގުތާ ހަމައަށްވެސް ސާފް ޗެމްޕިއަންޝިޕް ފުޓްބޯޅާ މުބާރާތުގައި އެންމެ ގިނަ ލަނޑު ޖެހުމުގެ ރެކޯޑް އަދި އޮތީ ދަގަނޑޭ އަތުގައެވެ. 

ދަގަނޑޭވަނީ މިހާތަނަށް ސާފް ޗެމްޕިއަންޝިޕުގައި 23 ލަނޑު ޖަހާފައެވެ. މި ގޯލުތަކާ އެކު ދަގަނޑޭ އަތުގައި ސާފްގެ ޓޮޕް ސްކޯރަރ ރެކޯޑް އޮތަސް އެ ރެކޯޑާ ހަމަ ކުރަން ޗެތްރީއަށް ބޭނުންވަނީ އެންމެ ދެ ލަނޑެވެ. މި ފަހަރުގެ މުބާރާތުގައި ޕާކިސްތާނު ކޮޅަށް ހެދި ހެޓްރިކާއެކު ޗެތްރީ ސާފްގައި ޖެހި ލަނޑުގެ އަދަދުވަނީ 21 އަށް އަރާފައެވެ. 

ގްރޫޕް ސްޓޭޖުގައި ނޭޕާލާ ދެކޮޅަށް މިރޭ އިންޑިޔާ ކުޅޭ މެޗުގައި ދަގަނޑޭގެ މި ރެކޯޑާ ހަމަކުރަން، ނުވަތަ ރެކޯޑް މުގުރާލުމުގެ ފުރުސަތު ޗެތްރީއަށް އެބައޮތެވެ.