ޓޫރިޒަމް މިނިސްޓަރު މިގޮތަށް ވިދާޅުވެފައިވަނީ ގްރީސްގެ ރިސޯޓަކާ ގުޅުވައި، ރާއްޖެއަށް ވުރެ އަގުހެޔޮ ހިދުމަތެއް ލިބޭ ކަމަށް ބުނެ ބޭރުގެ ނޫހެއްގައި ލިޔެފައިވާ ހަބަރަކާ ގުޅުވައެވެ.
މައުސޫމް ކުރެއްވި ޓްވީޓެއްގައި ވިދާޅުވީ ރާއްޖެއަށް ޒިޔާރަތްކުރާ ރިޕީޓް ފަތުރުވެރިންގެ އަދަދު ނިސްބަތުން އިތުރުވަމުން އައުމާއި އަހަރުން އަހަރަށް ރާއްޖެއަށް އަންނަމުންދާ ފަތުރުވެރިންގެ އަދަދާ އަޅާބަލާއިރު، ރާއްޖެ ފަދަ އިތުރު އެހެން އެއްވެސް މަންޒިލެއް ނެތް ކަމަށެވެ.
ވޯލްޑް ޓްރެވެލް އެވޯޑްސްގެ އެންމެ މަގުބޫލު މަންޒިލުގެ މަގާމު މިދިޔަ ތިން އަހަރުވެސް ހޯދާފައިވަނީ ރާއްޖޭން ކަމަށް މައުސޫމް ވިދާޅުވިއެވެ.
ޓޫރިޒަމް މިނިސްޓްރީން އާންމުކުރި އެންމެފަހުގެ ތަފާސް ހިސާބުތައް ދައްކާ ގޮތުން މި މަހުގެ 21 ވަނަ ދުވަހުގެ ނިޔަލަށް 886،978 ފަތުރުވެރިން ރާއްޖެއަށް ވަނީ އައިސްފައެވެ. މިއީ މިދިޔަ އަހަރުގެ އެ މުއްދަތާ އަޅާބަލާއިރު، 13.6 އިންސައްތަ އިތުރު އަދަދެކެވެ.
