މޫސަ ވިދާޅުވީ މާލޭ ރައްޔިތުންނަށް ގޯތި ދިނުމަކީ ދައުލަތުގެ ބިންތައް ހިލޭ ދިނުންކަމަށް ބުނެ ބައެއް ފަރާތްތަކުން ދައްކަނީ ފިތުނަވެރި ވާހަކަތަކެއް ކަމަށާއިފިތުނައެއް އުފައްދަން މަސައްކަތްކުރާ މަދު ބަޔަކު މާލޭ ރައްޔިތުން އުޅުނު ހާލަށް ނުވިސްނާ ޒާތީވެގެން ވާހަކަ ދައްކަމުންދާ ކަމަށެވެ.
މޫސަ ވިދާޅުވީ މާލޭ މީހަކަށް ގޯއްޗެއް ދީފާނެތީ އެކަމާއި ދެކޮޅަށް އަޑުއުފުލި ދެތިން މީހަކު އެކަން ހުއްޓުވުމަށް ކޯޓަށް ދިޔަކަމަށާއި، ނަމަވެސް އެކަމުގައި ކުރިއެރުމެއް ނުލިބުނުކަމަށެވެ.
އެވަރުންވެސް އޮޅުންނުފިލައިގެން މާލޭ މީހުންނާއި ޒާތީވަމުން ގޮސް، ސަރުކާރުން ގޯތި ދިނީމަ ދެން މި ނިކުންނަނީ ދައުލަތް ހުއްޓުވާލުންތޯ؟ މޫސަ ވިދާޅުވިއެވެ.
މޫސަ ވަނީ ސަރުކާރާއި ދެކޮޅަށް މަސައްކަތްކުރިޔަސް، މާލޭ މީހުންގެ ބޯހިޔާވަހިކަމާއި އަޅުވާ ގަދަބަސް ނުބުނަން އިލްތިމާސް ކުރައްވާފައެވެ.
ރައީސް އިބްރާހިމް މުހައްމަދު ސާލު ވަނީ މާލެ ސަރަހައްދުން ޝަރުތުހަމަވާ އެންމެނަށް ގޯތި ދިނުމަށް ނިންމާފައެވެ. މިގޮތުން ގެދޮރުވެރިއާ ސްކީމުގެ ދަށުން 12،000 އަށްވުރެ ގިނަ ގޯތި ވަނީ ދޫކޮށްފައެވެ.
