ދިރާސީ އައު އަހަރަށް، މާލެ ސަރަހައްދުގެ ސަރުކާރު ސްކޫލްތަކުގެ ގްރޭޑް އެކަކަށް ކުދިން ވެއްދުމުގެ ފުރުސަތު ހުލުވާލީ އޭޕްރީމް މަހުގެ ތެރޭގައެވެ. އަދި މިހާރު ވަނީ އެފުރުސަތުގެ މުއްދަތު ހަމަވެފައެވެ.
އެޑިއުކޭޝަން މިނިސްޓްރީގެ ޑެޕިއުޓީ މިނިސްޓަރ މުހައްމަދު އިހްސާން ވިދާޅުވީ، ގްރޭޑް އެކަކަށް ކުދިން ވެއްދުމަށް ހުޅުވާލި ފުރުސަތު ހަމަވީއިރު، މާލެ ސަރަހައްދުގެ ސްކޫލްތަކަށް 2800އެއްހާ ކުދިން ވައްދާފައިވާކަމަށެވެ.
ސަރުކާރު ސްކޫލްތަކަށް މިހާރު ޖާގަ ދެމުން އަންނަނީ، އެ ކުއްޖަކު ދިރިއުޅޭ ގެ ހުންނަ ސަރަޙައްދާ އެންމެ ކައިރި ސްކޫލްތަކަށް އިސްކަން ދީގެންނެވެ. މިއީ ސްކޫލަށް ކުދިން ގެންދިއުމަށް ފަސޭހަކުރުމަށް ކަނޑައަޅާފައިވާ އުސޫލެކެވެ.
ޑެޕިއުޓީ މިނިސްޓަރ އިހްސާން ވިދާޅުވީ، ދިރާސީ އައު އަހަރު ފެށެންވާއިރަށް ސްކޫލްތަކަށް މުދައްރިސުން ހަމަކުރުމުގެ މަސައްކަތް ކުރައްވަމުން އަންނަކަމަށެވެ. އެންމެ ބޮޑު އިސްކަމެއް ދެއްވަނީ ބިދޭސީ ޓިޗަރުންގެ ބަދަލުގައި ދޭސީ ޓީޗަރުންނަށްކަމަށާއި، އެގޮތުން ބައެއް ސްކޫލްތަކުގައި މަގާމުތައް އުފައްދައި އެ މަގާމުތަަކަށް މުވައްޒަފުން ނެގުމުގެ މަސައްކަތް ކުރިއަށްދާކަން އިހްސާން ފާހަގަކުރެއްވިއެވެ. އިހްސާން ވިދާޅުވީ މިހާރު މިނިސްޓްރީގެ ޕޮލިސީއަކީ ދިވެހި މުދައްރިސުން ހޯދުމަށް އިއުލާންކުރުމަށްފަހު ނުލިބިއްޖެނަމަ، ބިދޭސީ ޓީޗަރުން ހޯދުންކަމަށެވެ. އިހްސާން ވިދާޅުވީ، އަހަރުން އަހަރަށް ބަލާއިރު، ބިދޭސީ ޑޓީޗަރުންގެ ޢަދަދު ވަރަށް ބޮޑަށް މަދުވަމުން އަންނަކަމަށެވެ.
ދިރާސީ އަހަރުގެ ކިޔެވުން ނިމުނީ ޖޫން މަހުގެ 22ގައެވެ. އަދި ދިރާސީ އައު އަހަރުގެ ކިޔެވުން ފެށޭނީ އަންނަ މަހުގެ ހަ ވަނަ ދުވަހުއެވެ.
