މިފަހުން ހާރިޖީ ވަޒީރު އަބްދުﷲ ޝާހިދު އަރިހުގައި އެމެރިކާއަށް ކުރެއްވި ދަތުރުފުޅުގައި މެނޭޖިން ޑިރެކްޓަރު އަޙުމަދު ސަޢީދު މުހައްމަދު ވަނީ ނިއުޔޯކްގައި ހުންނަ އދގެ މައި މަރުކަޒުގައި އދގެ ސެކްރެޓަރީ ޖެނެރަލްއާއި ބައްދަލުކުރައްވާފައެވެ.
މި ބައްދަލުކުރެއްވުމުގައި، ޔުޓިލިޓީ ކުންފުންޏެއްގެ ގޮތުގައި ފެނަކައިން ފޯރުކޮށްދެމުންދާ ހިދުމަތްތަކާއި، އެ ހިދުމަތްތައް ފޯރުކޮށްދިނުމުގައި ދެމެހެއްޓެނިވި ތަރައްގީގެ ލަނޑުދަނޑިތައް (އެސް.ޑީ.ޖީސް) ހާސިލްކުރުމަށް ކުރަމުންދާ މަސައްކަތްތަކާ ބެހޭ މައުލޫމާތު ސައީދު ވަނީ އދ.ގެ ސެކްރެޓަރީ ޖެނެރަލްއާ ހިއްސާކުރައްވާފައެވެ.
އަދި ނެޓްޒީރޯއަށް ވާސިލުވުމަށް މި ސަރުކާރުން ކުރަމުންދާ މަސައްކަތްތައް ވެސް ސައީދު ވަނީ ގުޓަރޭޒްއާ ހިއްސާކުރައްވާފައެވެ.
މި ބައްދަލުކުރެއްވުމުގައި ގުޓަރޭޒް ވަނީ، ކާބަން ނިއުޓްރަލް ގައުމަކަށް ރާއްޖެ ހެދުމަށްޓަކައި މި ސަރުކާރުން ގެންގުޅޭ ނެޓް ޒީރޯ ސިޔާސަތު ތަންފީޒު ކުރުމަށް ފެނަކައިން ކުރަމުންދާ ދެމެހެއްޓެނިވި މަސައްކަތްތައް ފާހަގަކުރައްވައި ތައުރީފު ކުރައްވާފައެވެ.
ފެނަކައިގެ މެނޭޖިންގ ޑިރެކްޓަރު ވަނީ މި ދަތުރުފުޅުގައި މިނިސްޓަރ ޝާހިދުގެ އަރިހުގައި އެމެރިކާގެ ޚާރިޖީ ވަޒީރު އެންތަނީ ބްލިންކެންއާ ވެސް ވޮޝިންޓަންގައި ބައްދަލުކުރައްވާފަ އެވެ.
