ރާއްޖޭގެ އޮންލައިން މީޑިޔާއަކުން ރޭ ގެނެސްދިން ޕްރޮގުރާމެއްގައި ވާހަކަ ދައްކަވަމުން އެމްޑީޕީގެ ކުރީގެ ޗެއާޕާސަން މޫސާ މަނިކު ވިދާޅުވީ މިއަހަރު ބާއްވާ ރިޔާސީ އިންތިހާބުގައި "ޑިމްކޮރެޓްސް" އަކީ އެމްޑީޕީއަށް އޮތް ޗެލެންޖަކަށް ނުވާނެ ކަމަށާއި، އެއީ މިހާރު "ކައުންޓް" ކުރާ ބަޔެއް ނޫން ކަމަށެވެ.
މޫސަ ވިދާޅުވީ އެމްޑީޕީން ވަކިވެގެންދިޔަ ބަޔަކަށް އެމްޑީޕީގެ "ފިކުރެއް" ނުދިރުވޭނެ ކަމަށެވެ. އެމްޑީޕީގެ ފިކުރަކީ ރައްޔިތުން ބަލައިގެންފައިވާ ފިކުރެއް ކަމަށާއި އެ ފިކުރު ދިރުވޭނީ އެޕާޓީއަށް އެކަނި ކަމަށް މޫސަ ވިދާޅުވިއެވެ.
މޫސަ ވިދާޅުވީ ރާއްޖޭގެ ވެރިކަމަށް ވެސް ބޮޑުވަޒީރު ކަމަށްވެސް ކުރީގެ ރައީސް ނަޝީދަށް ދެން ވަޑައިނުގެންނެވޭނެ ކަމަށެވެ. އަދި އެމަނިކުފާނަށް އެމްޑީޕީއަށް އަލުން ވަޑައިގަތުމުގެ ފުރުސަތެއް ވެސް ދެން ނެތް ކަމަށާއި، އެ ފުރުސަތު ނަޝީދަށް ދީފިނަމަ އެޕާޓީގައި ނުހުންނަވާނެ ކަމަށް މޫސަ ވިދާޅުވިއެވެ. މޫސަ ވިދާޅުވީ މިއަހަރުގެ ރިޔާސީ އިންތިހާބު އެމްޑީޕީއަށް ކާމިޔާބުކުރެވޭނެ ކަމަށެވެ.
