ނަޝީދު މިހެން ވިދާޅުވީ އާރުޑީސީގެ ޗީފް ފައިނޭންޝަލް އޮފިސަރު (ސީއެފްއޯ) ޔާސިރު ހަސަންގެ އެކައުންޓަށް 13 މިލިއަން ރުފިޔާ ޖަމާވި ކަމަށް ބުނާ މައްސަލައެއް ފުލުހުން ތަހުގީގުކުރަން ފަށައިފި ކަމަށް މީޑިއާގައި ރިޕޯޓް ކުރުމުންނެވެ.
ޔާސިރުގެ އެކައުންޓަށް އެއް ފަހަރާ ގިނަ އަދަދެއްގެ ފައިސާ ޖަމާވި މައްސަލަ ފުލުހަށް ހުށަހެޅީ އެމްއެމްއޭގެ ފައިނޭންޝަލް އިންޓެލިޖެންސް ޔުނިޓު (އެފްއައިޔޫ) އިން ކަމަށް މައުލޫމާތު ލިބެއެވެ. އެމައްސަލައިގެ ތަހްގީގު ފުލުހުން ފެށި ނަމަވެސް އެތަހްގީގަށް ސަރުކާރުން ހުރަސް އަޅަމުންދާ ކަމަށް ބައެއް މީޑިއާތަކުން ވަނީ ރިޕޯޓް ކޮށްފައެވެ.
އާރްޑީސީގެ މެނޭޖިން ޑިރެކްޓަރު މޫސާ އަލި މަނިކު (މޫކޭ) އަދި ޔާސިރަކީ އެއް ރަށަކަށް އުފަން، ވަރަށް ގާތް ދެ ރަހުމަތްތެރިންނެވެ. އަދި ޔާސިރު ވަނީ މީގެ ދުވަސްކޮޅެއް ކުރިން މޫކޭގެ ކޮއްކޮއަކާ ކައިވެނިކޮށްފައެވެ. ޔާސިރުގެ އެކައުންޓަށް ޖަމާވި ފައިސާ އަކީ މޫކޭ އާއި ދެމީހުން ބައިވެރިވެގެން އާރްޑީސީން "ވަގަށް ނެގި" ފައިސާ ކަމަށް ބައެއް ފަރާތްތަކުން އަންނަނީ ތުހުމަތު ކުރަމުންނެވެ. ނަމަވެސް މޫކޭ ވަނީ އެތުހުމަތުތައް ދޮގުކޮށްފައެވެ.
