ސީއެންއެމް އިން "ރިޔާސީ ރޭސް 2023" ގެ ނަމުގައި ސީއެންއެމް ޓީވީން ގެނެސްދޭ ޕޮރޮގްރާމްގައި ރޭ ވާހަކަފުޅު ދައްކަވަމުން މޫސަ ވިދާޅުވީ ސިޔާސީ ޕާޓީ އަކާއި ގުޅެނީ އޭނާއަށް ފައިދދާތަކެއް ވާތީކަމަށެވެ.
މޫސަ ވިދާޅުވީ ރާއްޖޭގެ ވެރިކަމަށް ވެސް ބޮޑުވަޒީރު ކަމަށްވެސް ކުރީގެ ރައީސް ނަޝީދަށް ދެން ވަޑައިނުގެންނެވޭނެ ކަމަށެވެ.
މޫސަ ވިދާޅުވީ މިއަހަރުގެ ރިޔާސީ އިންތިހާބު އެމްޑީޕީއަށް ކާމިޔާބުކުރެވޭނެ ކަމަށެވެ.
ރީކޯ ވިދާޅުވީ ކޮންމެ މީހަކުވެސް ދުނިޔޭގައި އުޅޭއިރު ފުރަތަމަ ވިސްނާނީ އެމީހާގެ އަމިއްލަ ކަންތައްތަކަށް ކަމަށާއި، އެގޮތުން ރީކޯވެސް ވިސްނުން ބެހެއްޓީ އެގޮތަށް ކަމަށެވެ.
ކުރިން އެމްޑީޕީގައި އުޅުއްވުމަށްފަހު ފަހުން އެމްޑީޕީ ތެރޭގައި އުފެދުނު މައްސަލަތަކެއްގެ ސަބަބުން ރީކޯ އެމްޑީޕީން އޭރު ބޭރު ކުރުމުން ޕީޕީއެމް އާއި ގުޅި ރީކޯވަނީ ރައީސް ޔާމީންގެ ދައުރުގައި ރައްޔިތުން މަޖުލީގެ ނައިބު ރައީސްކަންވެސް ކުރައްވާފައެވެ.
މޫސަ މިހެން ވިދާޅުވެފައިވާއިރު، ދައުލަތުގެ އެކި ކުންފުނިތަކަށް ދައްކަންޖެހޭ ފައިސާ ރީކޯ މޫސާ މަނިކު ނުދައްކާ ކަމަށް ވަރަށް ގިނަފަރާތްތަކުން ވަނީ ފާޑު ކިޔާފައެވެ.
ނަމަވެސް މޫސަ ވަނީ އޭނަޔާއި ދޭތެރޭ ދެކެވޭ ވާހަކަތައް ދޮގު ކުރައްވާފައެވެ. މޫސަ ވިދާޅުވީ މޫސަ އަކީ ދުވަހަކުވެސް ތަނަކުން ވައްކަމެއް ކުރި މީހެއް ނޫން ކަމަށާއި، ކޮރަޕްޝަނެއްގެ ތެރެއަށް ވަންނާނެ މީހެއްނޫން ކަމަށާއި، އަދި ވަދެފައިވެސް އޮތް މީހެއް ނޫން ކަމަށެވެ.
އަދި ދައުލަތުން ގެރެންޓީ ދީގެން ލޯނެއްވެސް ނަގާފައި ނުވާނެ ކަމަށްވެސް މޫސަ ވަނީ ވިދާޅުވެފައެވެ. މޫސަ ފާހަގަ ކުރެއްވީ މޫސައަށް އެކި ނޫސްތަކުންނާއި، އެކީ ފަރާތްތަކުން ފާޑު ކިޔަނީ މޫސަ އަކީ ސިޔާސީ ފަރާތެއް ކަމަށްވާތީ ކަމަށެވެ.
