މީގެ 41 އަހަރުކުރިން ފެށިގެން ރާއްޖޭގައި ޝަހީދުންގެ ދުވަސް ފާހަގަކުރަމުން އަންނައިރު މި ދުވަހަކީ ޕޯޗްގީޒުންގެ އަތްދަށުން ރާއްޖެ މިނިވަންކުރުމަށް އަލިރަސްގެފާނު ކުރެއްވި މަތިވެރި ޖިހާދުގެ ހަނދާތައް އާކުރުމަށް ފާހަގަކުރަމުންދާ ދުވަހެކެވެ.
ހޯމް މިނިސްޓްރީން މީގެ ކުޑައިރުކޮޅެއް ކުރިން ކުރި ޓްވީޓެއްގައި ބުނީ، ކޮވިޑް19 އިން ރައްކާތެރިވުމަށްޓަކާ ގިނަ މީހުން ބައިވެރިވާ ހަރަކާތްތައް ނުބޭއްވުމަށް ކަމާގުޅުންހުރި މުއައްސަސާތަކުން ބާރުއަޅަމުންދާތީ، ކޮންމެ އަހަރަކު ޝަހީދުންގެ ދުވަހުގެ މުނާސަބަތުގައި ބާއްވާ ޖަލްސާ މިއަހަރު ނުބާއްވާގޮތަށް ނިންމާފައިވާ ކަމަށެވެ.
ހޯމް މިނިސްޓްރީގެ މިނިސްޓްރީގެ އެކްޒެކްޓިވް ކޮމިޓީގެ ލަފާގެ މަތިން، ޝަހީދުންގެ ދުވަހުގެ ޖަލްސާ ނުބޭއްވި ނަމަވެސް ޝަހީދުންގެ ދުވަހުގެ މުނާސަބަތުގައި ކުރިޔަށްގެންދަން ރާވާފައިވާ ގިނަމީހުން އެއްވުން ނުހިމެނޭ ހަރަކާތްތައް ކުރިއަށް ދާނެ ކަމަށް ވެސް މިނިސްޓްރީން ބުނެ އެވެ.
ކޮންމެ އަހަރަކު ވެސް ރާއްޖޭގައި ޝަހީދުންގެ ދުވަސް ވަރަށް ކުލަ ގަދަކޮށް ފާހަގަކުރެ އެވެ. ނަމަވެސް ދުނިޔޭގައި ހަލުވިކަމާއެކު ފެތުރެމުންދާ ކޮރޯނާ ވައިރަހުގެ ނުރައްކާ ރާއްޖެއަށް ފޯރައި، ރާއްޖޭގައި މިވަނީ ފުރަތަމަ ފަހަރަށް ސިއްހީ ކުއްލި ނުރައްކަލުގެ ހާލަތު ވެސް މިމަހުގެ 12 ވަނަ ދުވަހު އިއުލާންކޮށްފަ އެވެ.
މިހާތަނަށް ރާއްޖެއިން 11 މީހަކު ކޮރޯނާ ވައިރަހަށް ޕޮޒިޓިވްވެފައިވާއިރު މި އެންމެނަކީ ވެސް ބިދޭސީންނެވެ. އެޗްޕީއޭއިން އަންނަނީ މީހުން އެއްވެ އުޅޭ ހަރަކާތްތައް ނުހިންގުމަށާއި ބަލިން ރައްކާތެރިވުމުގެ ގޮތުން ފަރުދީ ގޮތުން ކުރެވޭ ކަންކަން ކުރުމަށް ވެސް އިލްތިމާސް ކުރަމުންނެވެ.
