ހުޅުމާލޭގައި ކުރިއަށްގެންދިޔަ ހަފްލާއެއް ނިމުން ފާހަގަކުރުމަށް ބޭއްވި ރަސްމިއްޔާތުގައި ވާހަކަ ދައްކަވަމުން މިނިސްޓަރު ވިދާޅުވީ، ރިއަލް އެސްޓޭޓް އުސޫލުގެ ދަށުން ފްލެޓްތައް ވިއްކާ ގޮތަށް ހިންގާ މަޝްރޫއޫތަކަކީ ވެސް ބޯހިޔާވަހިކަމުގެ މައްސަލަ ހައްލުކުރުމަށް ހިންގާ މަޝްރޫއުތަކެއްކަމަށެވެ.

މިނިސްޓާ ވިދާޅުވީ ހުރިހާ ފަންތިއަކަށް އަމާޒުކޮށްގެން ބޯހިޔާވަހިކަމުގެ މަޝްރޫއުތައް ހިންގަމުންދާކަމަށެވެ. ސަރުކާރުން މަސައްކަތް ކުރަމުން އަންނީ ރާއްޖޭގެ ބޯހިޔާވަހިކަމުގެ މައްސަލައަށް ޖުމްލަ ހައްލެއް ހޯދުމަށް ކަމަށް ވެސް އަސްލަމް ވިދާޅުވިއެވެ. 

މިނިސްޓާ މިހެން ވިދާޅުވެފައި މިވަނީ ބިންވެރިއާ ސްކީމުގެ ދަށުން މުއްސަދިންނަށް ވެސް ގޯތި ދިންކަމަށް ބުނެ ބައެއް މީހުން ޝަކުވާކުރަމުން އަންނަ ދަނޑިވަޅެއްގައެވެ. އެ މައްސަލައިގައި މިނިސްޓަރު ވިދާޅުވެފައިވަނީ "ކޮންމެ މީހަކު ވެސް ޝަރުތުހަމަވާ ނަމަ ގޯތި ލިބޭނެ،" ކަމަށެވެ.