އާބަންކޯއިން ބުނީ މާލޭގެ މީހުން ދިރިއުޅޭ ސަރަހައްދުތަކުގައި ގަރާޖުތައް ހިންގާ ފަރާތްތަކަށް އެ މަސައްކަތަށް ބޭނުންވާނެ ބިން ކަނޑައަޅާ 23 ޕްލޮޓެއް އެ ކޯޕަރޭޝަނުގެ ފަރާތުން ހުޅުވާލާފައިވާ ކަމަށެވެ. އެކަން ކުރުމުގެ އެންމެ ބޮޑު އެއް ބޭނުމަކީ މިފަދަ މަސައްކަތް ކުރާ ތަންތަން ރައްކާތެރި ސަރަހައްދުތަކަށް ބަދަލުކޮށް، ވިޔަފާރިތަކަށް ފަހި ފުރުސަތުތަކެއް ހޯދައިދިނުން ކަމަށް އާބަންކޯއިން ބުނެއެވެ. އާބަންކޯއިން ބުނެފައިވަނީ މިފަހަރު ހުޅުވާލެވުނު 23 ޕްލޮޓަށް 190 ފަރާތަކުން ވަނީ ފޯމު ހުށަހަޅާފައި ކަމަށެވެ.
އާބަންކޯއިން ބުނި ގޮތުގައި 23 ޕްލޮޓުގެ ހައްގުވެރިން ކަނޑައެޅުމުގައި އެ ކޯޕަރޭޝަނުގެ ފަރާތުން ވަނީ ހުށަހެޅި ފޯމުތަކުގައިވާ މައުލޫމާތުތައް ސައްހަ ކުރުމަށް ގަރާޖުތަކަށް ޒިޔާރަތްކޮށް ސާވޭއެއް ކުރިއަށް ގެންގޮސްފައި ކަމުގައެވެ. އެ ސާވޭއިން ބެލިބެލުމުގައި ތޮށްޖެހިފައިވާ ނުވަތަ އާންމުން ދިރިއުޅޭ ގެތަކާއި ކައިރީގައި ހިންގޭ ގަރާޖުތައް ބަލާފައިވާ ކަމަށް އެ ކޯޕަރޭޝަނުން ބުނެއެވެ. އާބަންކޯއިން ބުނީ ޕްލޮޓްތައް ކަނޑައެޅުމުގައި އިސްކަންދީފައިވަނީ ހަތަރު ފުރޮޅުލީ ވެހިކަލްތައް ސާވިސް ކުރާ ގަރާޖުތަކަށް ކަމަށެވެ.
ގަރާޖުތައް ހުޅުމާލެއަށް ބަދަލުކުރަން ޕްލޮޓަށް ހޮވުނު ފަރާތްތަކުގެ ގުރު ނެގުން - ފޮޓޯ:އާބަންކޯ
މިފަހަރު ހުޅުވާލެވުނު ފުރުސަތުގައި ދިނުމަށް ހަމަޖެހިފައިވާ ޕްލޮޓްތަކުގެ ބޮޑުމިނުގައި 1،297 އަކަފޫޓުން ފެށިގެން 1،447 އަކަފޫޓު ހުންނާނެ ކަމަށް އާބަންކޯއިން ބުނެއެވެ. އެ ކޯޕަރޭޝަނުން ބުނެފައިވަނީ ލިބުނު ތަރުހީބަށް ބަލަައި މާލޭގައި ގަރާޖުތައް ހިންގުމަށް ހުރި ދަތިތަކާއި ހުރި ނުރައްކާތަކަށް ހައްލެއް ހޯދައިދިނުމަށް އިތުރު ޕްލޮޓުތައްވެސް ހުޅުވާލުމަށް ވަނީ ހަމަޖެހިފައި ކަމަށެވެ.
