ކްރިމިނަލް ކޯޓުން މިގޮތަށް ހުކުމްކޮށްފައިވަނީ، މި މައްސަލައިގައި ދައުލަތުން ދައުވާ އުފުލާފައިވާ މުއާވިޔަތު އަހުމަދު ސަމީރު އޭނާ އެ ބަންގުރާ ފުޅިތައް ރާއްޖެ އެތެރެކުރިކަމަށް އިއުތިރާފުވުމުންނެވެ.
އޭނާގެ މައްޗަށް ކޮށްފައިވަނީ ހުއްދަ ނަގައިގެން ކުރަންޖެހޭ ކަމެއް ހުއްދަ ނުނަގައި ކުރުމުގެ ކުށުގެ ދައުވާކަމަށްވާއިރު، އޭނާ ކުށަށް އިއުތިރާފުވެފައިވަނީ ދައުވާއަށް ޖަވާބު ދިނުމުގެ މަރުހަލާގައެވެ. އަދި އަވަސްނިޔާގެ ޝަރީއަތުގެ އަޑުއެހުމުގައިވެސް އިއުތިރާފު ދަމަހައްޓާފައިވާތީ ޝަރީއަތުން ވަނީ އޭނާގެ އިއުތިރާފަކީ ސައްހަ އިއުތިރާފެއްކަމަށް ކަނޑައަޅާފައެވެ.
މި ހާދިސާއަކީ މިދިޔަ އަހަރު ޑިސެންބަރު މަހުގައި ހިނގި ހާދިސާއެކެވެ. އެގޮތުން މި މައްސަލައިގައި މުއާވިޔަތު އަހުމަދު ސަމީރު އިތުރު މީހަކާއެކު ހުޅުމާލޭ ފޭސް 2 ގެ ސަފާރީ ޖެޓީ ކައިރިން ކާރެއްގައި މާލެއަށް ބަނގުރާ އެތެރެކުރަން އުޅޭކަމުގެ މައުލޫމާތު ދިވެހި ފުލުހުންގެ ހިދުމަތުގެ އިންޓެލިޖެންސްއަށް ލިބިގެން ސިނަމާލެ ބްރިޖު ކައިރިން މާލެއަށް ފައިބާ ޓްރެފިކް ލައިޓު ކައިރީގައި ފުލުހުން ވަނީ ހަރަކާތްތެރިވެފައެވެ. އަދި ކާރު އެހިސާބަށް އައުމުން ކާރު މަޑުކޮށް، ބަލައި ފާސްކުރިއިރު ކާރުގެ ޑިކީ ތެރެއިން ވަނީ 264 ފުޅި ބަނގުރާ ފެނިފައެވެ.
މިއީ އެކަށީގެންވާ ޝައްކެއް ނެތް މިންވަރަށް މުއާވިޔަތު އަހުމަދު ސަމީރުގެ މައްޗަށް ސާބިތުވާ މައްސަލައެއްކަމަށް ޝަރީއަތުން ކަނޑައަޅާފައިވާއިރު، އޭނާގެ މައްޗަށް ކަނޑައެޅުނު ޖަލު އަދަބު ޖޫރިމަނާގެ އަދަބަކަށް ބަދަލުކުރުމާމެދު އިއުތިރާޒެއް ނެތްކަމަށް ދަޢުލަތުވެސް ފާހަގަކޮށްފައިވެއެވެ.
