ގުރައިދޫ ދާއިރާ އަށް ކުރައްވަމުންގެންދަވާ ކެމްޕެއިން ދަތުރުފުޅުގައި ބޭއްވި ކަންމަތީ ބައްދަލުވުމުގައި ވާހަކަފުޅު ދައްކަމުން ރައީސް ސޯލިހު ވިދާޅުވީ ގުރައިދޫ ދާއިރާގެ ރައްޔިތުން އެދޭ ކަންކަން ކޮށްދެއްވާނެ ކަމަށާއި މީގެ ކުރިން ވެސް އެ ދާއިރާގެ ރަށްރަށުގެ ރައްޔިތުން އެދުނު ކަންކަން ކޮށްދެއްވުމަށް ވަރަށް ބޮޑު އިސްކަމެއް ދެއްވާ ކަމަށެވެ.
މީގެ އިތުރުން އޭޓީއެމް ގާއިމްކުރަން ހަމަޖެހިފައިވާ ރަށްތަކުގެ ލިސްޓުގެ ކުރީގައި ކ.ގުޅި އޮތް ކަމަށް ވިދާޅުވިއެވެ. އެ ރަށުގެ ސިއްހީ މަރުކަޒުގެ ލެބޯޓްރީ ގާއިމްކުރުމުގެ މަސައްކަތްވެސް ކުރިއަށް ރޭވިފައި ހުރި މަސައްކަތްތަކުގެ ތެރޭގައިވާ ކަމަށް ރައީސް ވިދާޅުވިއެވެ.
އޭޓީއެމްގެ ހިދުމަތަކީ ގުޅީގެ ރައްޔިތުން އެންމެ ބޮޑަށް ބޭނުންވެފައިވާ ހިދުމަތް ކަމަށް އެ ރަށުގެ އާއްމުން ބުނެއެވެ. އަދި ރަށުގެ ޒަމާންވީ ބިމުގެ ދަތިކަމުގެ މައްސަލަ އަށް ސަރުކާރުން ހައްލު ހޯދައި ދިނުމަކީ ނުހަނު އުފާ ކުރާ ކަމެއް ކަމަށް އާއްމުން ވަނީ ބުނެފައެވެ.
