އެމްޓީސީސީން ރަތަފަންދޫގައި ކުރަމުން އަންނަ މަސައްކަތްތައް ބައްލަވާލެއްވުމަށް އެ ރަށަށް ވަޑައިގެން ނޫސްވެރިންނަށް މައުލޫމާތުދެއްވަމުން އާޒިމް ވިދާޅުވެފައިވަނީ އެ ރަށުގެ ގޮނޑުދޮށް ހިމާޔަތްކުރުމުގެ މަޝްރޫއުގެ ދަށުން ގާތްގަނޑަކަށް 2،000 ފޫޓުގެ ސަރަހައްދެއްގައި ބޮޑުހިލަ ޖަހާ ހިމާޔަތްކުރުމުގެ މަސައްކަތް ކުރަމުން އަންނަ ކަމަށެވެ.
އާޒިމް ވިދާޅުވި ގޮތުގައި އެ މަސައްކަތުގެ ތެރެއިން ރަށުގެ ބޮޑު ސަރަހައްދެއް ހިމާޔަތްކުރެވިގެން ދާނެ ކަމުގައެވެ. މި މަޝްރޫއުގެ މަސައްކަތަކީ ރަތަފަންދޫގެ ރައްޔިތުންގެ ވަރަށް ބޮޑު އިންތިޒާރެއްކަން ފާހަގަކުރައްވާ އާޒިމް ވިދާޅުވީ ގޮނޑުދޮށް ހިމާޔަތްކުރުމުގެ މަސައްކަތް އަންނަ ނޮވެމްބަރު މަހުގެ ކުރިން ނިންމާނެ ކަމަށެވެ.
އެމްޓީސީސީގެ ސީއީއޯ އާދަމް އާޒިމް މައުލޫމާތު ދެއްވަނީ - ފޮޓޯ:އެމްޓީސީސީ
ރަތަފަންދޫ ކައުންސިލުގެ ރައީސް މުހައްމަދު އަބްދުﷲ ވިދާޅުވީ އެ ރަށަށް އުދައަރައި ރަށް ގިރުމުގެ މައްސަލަ ދިމާވާތާ ސާޅީހަކަށް އަހަރުވެފައިވާ ކަމަށެވެ. ކޮންމެ އަހަރެއްގެވެސް މޫސުން ގޯސްވާ ދުވަސްވަރު ރަށުގެ ރައްޔިތުން ތިބެނީ ބިރުވެރިކަމެއްގެ ތެރޭގައި ކަމަށް މުހައްމަދު އަބްދުﷲ ވިދާޅުވިއެވެ.
މުހައްމަދު އަބްދުﷲ ވިދާޅުވެފައިވަނީ އުދަ އަރާއިރު، ރަށުތެރެއަށް 50 އާއި 100 ފޫޓުގެ ސަރަހައްދަކަށް ރާޅު އަރާ ކަމަށެވެ. ރާޅު އަރާ ބައެއް ސަރަހައްދުތަކުގެ މީހުންނަށް ދިރިއުޅުމަށް ދަތިވެފައިވާ ކަމަށް ކައުންސިލުގެ ރައީސް ވިދާޅުވިއެވެ. މުހައްމަދު އަބްދުﷲ ވިދާޅުވީ ލޮނުވަނުމުގެ ސަބަބުން މީހުން ދިރިއުޅެމުން އަންނަ ގޭގެ އަށާއި ރަށުގެ ދަނޑުބިންތަކަށް ބޮޑެތި ގެއްލުންތަކާ ކުރިމަތިލާން ޖެހިފައިވާ ކަމަށެވެ.
ރަތަފަންދޫ ގޮނޑުދޮށް ހިމާޔަތްކުރުމުގެ މަޝްރޫއުގެ މަސައްކަތް އެމްޓީސީސީން ފަށާފައިވަނީ މިދިޔަ އަހަރުގެ ސެޕްޓެމްބަރު މަހުގެ ތެރޭގައެވެ. މި މަޝްރޫއުގެ ދަށުން 461 މީޓަރުގެ ސަރަހައްދެއްގައި ރިވެޓްމެންޓް ޖެހުމާއި 240 މީޓަރުގެ ސަރަހައްދެއްގައި ބޭރުތޮށިލުމުގެ މަސައްކަތް ކުރުމަށް ވަނީ ހަމަޖެހިފައެވެ. އޭގެ އިތުރުން 6،600 ކިއުބިކް މީޓަރުގެ ވެލި ރަށުގެ ގޮނޑުދޮށަށް އެޅުމުގެ މަސައްކަތްވެސް އެމްޓީސީސީން ކުރާނެއެވެ. ޕްލޭނިން މިނިސްޓްރީން އެމްޓީސީސީ އާ ހަވާލުކޮށްގެން ކުރިއަށްގެންދާ މި މަޝްރޫއުގެ އަގަކީ 27.8 މިލިއަން ރުފިޔާއެވެ.
