މުޒާހަރާ ކުރި މީހުން ބުނެފައިވަނީ އެރަށަށް ބަޖެޓްކޮށްފައިވާ މަޝްރޫއުތައް ކުރިއަށްނުދާކަމަށެވެ.
ކުމުންދޫގައި މުޒާހަރާކުރި މީހުން ކަންބޮޑުވުން ފާޅުކުރީ، ފެނާއި ނަރުދަމާގެ މަސައްކަތް ލަސްވުމާ، ބަނދަރުގެ މައްސަލައަށް ހައްލު ނުލިބުމާ، ސިއްހީ މަރުކަޒުގެ އާ އިމާރާތުގެ މަސައްކަތް ލަސްވުން ހިމެނެއެވެ. ޔޫތު ސެންޓަރާއި ސްކޫލުގެ ވަށާފާރުގެ މަސައްކަތް ނުފެށި ލަސްވުމާއި ހެލްތް ސެންޓަރު އާ އިމާރާތާއި ސްކޫލްގެ އާ ކުލާސް ރޫމް އިމާރާތް ނުފެށި ލަސްވުން ހިމެނެއެވެ.
މުޒާހަރާއަށް ނުކުތީ އެ ރަށުގައި އެމްޑީޕީއަށް ތާއީދު ކުރާ މީހުންކަމަށް އެރަށު ބައެއް މީހުން ސޯޝަލް މީޑިއާގައި ބުނެފައިވެއެވެ.
ކުމުންދޫ ބައެއް މީހުން މުޒާހަރާއަށް ނުކުމެފައިވާއިރު، މިއަހަރު މިހާތަނަށް ދުވާލެއްގެ މައްޗަށް 30 މިލިއަން ރުފިޔާ ތަރައްގީގެ މަޝްރޫތަކަށް ހޭދަކުރާކަމަށް ތަފާސް ހިސާބުތަކުން ދައްކައެވެ.
ދައުލަތުގެ ބަޖެޓުން ތަރައްގީގެ މަޝްރޫއުތަކަށް ނުވަތަ ޕަބްލިކް ސެކްޓާ އިންވެސްޓްމަންޓް ޕްރޮގްރާމް (ޕީއެސްއައިޕީ) އަށް ކުރި ހޭދަ 5.5 ބިލިއަން ރުފިޔާއިން މައްޗަށް ވަނީ ގޮސްފައެވެ.
ފިނޭންސް މިނިސްޓްރީން އާންމުކޮށްފައިވާ ތަފާސް ހިސާބުތަކުން ދައްކާ ގޮތުން:
- މިދިޔަ އަހަރުގެ ޖުލައި މަހުގެ ހަވަނަ ދުވަހުގެ ނިޔަލަށް ޕީއެސްއައިޕީއަށް 3.7 ބިލިއަން ރުފިޔާ ވަނީ ހޭދަކޮށްފައި
- މި އަހަރުގެ އެ މުއްދަތުގައި 5.5 ބިލިއަން ރުފިޔާ ހޭދަކޮށްފައިވޭ
- އެވްރެޖުކޮށް މަހަކަށް 900 މިލިއަން ރުފިޔާއަށް ވުރެ ބޮޑު ހޭދައެއް ދަނީ ކުރަމުން
ތަފާސް ހިސާބުތަކުން ދައްކާގޮތުން ޕީއެސްއައިޕީން އެންމެ ބޮޑު ހަރަދެއް ކޮށްފައިވަނީ މަގު ހެދުމަށާއި ބިން ހިއްކުމުގެ އިތުރުން ބަނދަރު ތަރައްގީ ކުރުމުގެ މަޝްރޫއުުތަކަށެވެ.
ޖުލައި މަހުގެ ހަ ވަނަ ދުވަހުގެ ނިޔަލަށް ޕީއެސްއައިޕީން އެންމެ ބޮޑު ހޭދައެއް ކޮށްފައިވަނީ:
- މަގު ހެދުމުގެ މަޝްރޫއުތަކަށް - 736.1 މިލިއަން ރުފިޔާ
- ބިން ހިއްކުމުގެ މަޝްރޫއުތަކަށް - 652.4 މިލިއަން ރުފިޔާ
- ބަނދަރު ތަރައްގީކުރުމުގެ މަޝްރޫއުތަކަށް - 629.6 މިލިއަން ރުފިޔާ
- ފެނާއި ނަރުދަމާގެ ނިޒާމުތައް ގާއިމުކުރުމަށް - 625.9 މިލިއަން ރުފިޔާ
- އެއާޕޯޓު އެޅުމުގެ މަޝްރޫއުތަކަށް - 606.3 މިލިއަން ރުފިޔާ
