މި އުންމީދަކީ ކުރީގެ ރައީސް އަބްދުﷲ ޔާމިންގެ ވެރިކަމުގައިވެސް އެރަށު ރައްޔިތުންނަށް ދެއްވި އުންމީދެކެވެ. ނަމަވެސް އޭރު ރައީސް ޔާމިން ހިންގެވީ "ޖަރީމާއެއް" ކަމަށް ރައީސް މިއަދު ވިދާޅުވިއެވެ.
އެގޮތުން އެރަށް ކައިރީގައި އޮތް ތިން ރަށް އެއް ރަށުގެ ގޮތުގައި ވިއްކާލާފައިވާކަން ރައީސް ފާހަގަކުރެއްވިއެވެ.
ރައީސް ސިފަ ކުރެއްވި ގޮތުގައި އެއީ ޔާމީން ހިންގަވާފައިވާ ވަރަށް ބޮޑެތި ޖަރީމާތަކެކެވެ.
ރައީސް ވަނީ އެއް ރަށުގެ ގޮތުގައި ތިން ރަށް ދިން ނަމަވެސް އަދިވެސް އެ ރަށްތައް ތަރައްގީ ކުރެވިފައި ނުވާ ކަމަށް ވިދާޅުވެފައެވެ. ނަމަވެސް މި ސަރުކާރުން އެކަމަށް އަލި މަގެއް ހޯއްދަވައިދެއްވާނެ ކަމަށް ވިދާޅުވިއެވެ.
އެގޮތުން ކޮޅުފުއްޓާއި ކައިރިން ރިސޯޓެއް ތަރައްގީ ކުރުމުގެ މަޝްރޫއެއް ހިންގަވައިދެއްވާނެ ކަމުގެ ޔަގީންކަން ދެއްވިއެވެ. ރައީސް އެހެން ވިދާޅުވުމުން ރައްޔިތުން ވަނީ ކޮޅަށް ތެދުވެ ވަރަށް ހޫނު އަތްތިލަ ބަޑިއެއް ޖަހާފައެވެ.
