ފާއީތުވީ ފަސް އަހަރު ދުވަހުގެ ތެރޭގައި ރައީސް އިބްރާހިމް މުހައްމަދު ސާލިހުގެ ސަރުކާރުން ހިންގަވާފައިވާ ގިނަ ތަރައްގީގެ މަޝްރޫތަކުގެ ސަބަބުން ދެން އެއްވެސް ކެންޑިޑޭޓަކަށް އެމަނިކުފާނާ އަރާ ހަމަ ނުކުރެވޭނެކަށް އަދާލަތު ޕާޓީގެ ރައީސް އިމްރާން އަބްދުﷲ ވިދާޅުވެއްޖެއެވެ.
Advertisement
މ. މުލަކުގައި ރޭ ބޭއްވި ކެމްޕޭން ޖަލްސާގައި ވާހަކަދައްކަވަމުން ވިދާޅުވީ ރައީސް ސާލިހުގެ ވެރިކަމުގައި ރާއްޖޭގެ އިގްތިސާދު ދެގުނަ ވެފައިވާކަމަށެވެ.
"ރައީސް ރައްޔިތުންނާ ބައްދަލުކުރައްވާ މިހާރު ކޮށްދެއްވާފައިވާ ކަންތައް ކިޔައިދެއްވާ، ދެން ކުރައްވަން ގަސްދުކުރައްވާ ކަންތައްތައް ކިޔައިދެއްވާ، ރާއްޖެއަށް ގެންނަވަން ތިވިދާޅުވާ ބޮޑު ބަދަލުގެ ވާހަކަ ވިދާޅުވެ ދެއްވާ، ރާއްޖޭގެ އިގްތިސާދު ދެގުނަ ކުރައްވާނެ ކަމަށް ވިދާޅުވެ ދެއްވާ، މިހުރިހާ ކަމެއްގެ ވާހަކަ ރައްޔިތުންނާ ހިއްސާކުރެއްވީމާ ރައީސް ތިހުންނެވީ އެހެން ކެންޑިޑޭޓުންނަށް ވުރެ މާކުރިއަރާފައި އެނގޭތޯ؟ ދެން އަރާ ހަމަނުކުރެވޭނެ އެނގޭތޯ،" އިމްރާން ވިދާޅުވި އެވެ.
އިމްރާން ވިދާޅުވީ ކޮވިޑު 19 ގެ ބަލިމަޑުކަމުން ރާއްޖޭގެ އިގްތިސާދަށް ގެއްލުންތަކެއް ވީނަމަވެސް، އެ ދަތިކަމުން އަރައިގަނެވުނީ ރައީސް ސާލިހު ގެންގުއްވި ހިކުމަތްތެރި ޕޮލިސީތަކުގެ ސަބަބުންކަމަށެވެ.
އިމްރާން ވިދާޅުވީ މ އަތޮޅަކީ ކުރިން އެމްޑީޕީއަށް އެހާ ތާއީދު އޮތް އަތޮޅެއް ނޫންކަމަށެވެ. ނަމަވެސް އެ އަތޮޅުންވެސް ރައީސް އަށް 60 ޕަސަންތު ތާއީދު ލިބިވަޑައިގަންނަވާނެކަމަށް ވަނީ ވިދާޅުވެފައެވެ. އަދި އިއްޔެ އޭނާ ވަނީ އޭނާ ނިސްބަތްވާ ކޮޅުފުށިން 65 ޕަސަންޓު ވޯޓު ރައީސް ސާލިހަށް ލިބިވަޑައިގަންނަވާނެކަމަށް ވިދާޅުވެ ހިސާބު ޖައްސަވާފައެވެ.
