މިލަންދޫގައި އެމްޓީސީސީން ކުރިއަށް ގެންދާ ތަރައްގީގެ މަޝްރޫއުތަކާ ގުޅޭގޮތުން ނޫސްވެރިންނަށް މައުލޫމާތު ދެއްވަމުން އެ ކުންފުނީގެ ސީއީއޯ އާދަމް އާޒިމް ވިދާޅުވީ 75 މިލިއަނަށް ވުރެ ގިނަ ރުފިޔާ ހޭދަކޮށްގެން ތަރައްގީ ކުރަމުން އަންނަ އެ ރަށު ބަނދަރު މަޝްރޫއުގެ މަސައްކަތް ތާވަލާ އެއްގޮތަށް ކުރިއަށްދާ ކަމަށެވެ.

ދެ ފިޔަވައްސަކަށް ބަހާލައިގެން 36 މިލިއަނަށް ވުރެ ގިނަ ރުފިޔާ ހޭދަކޮށްގެން އެ ރަށުގައި ކުރިއަށް ގެންދާ ގޮނޑުދޮށް ހިމާޔަތްކުރުމުގެ މަޝްރޫއުގެ ފުރަތަމަ ފިޔަވަހީގެ މަސައްކަތް މިހާރު ނިމުމަކާ ގާތްވެފައިވާއިރު، އެ މަޝްރޫއާ އެކު އެ ރަށަށް ކުރިމަތިވެފައިވާ ރަށްގިރުމުގެ މައްސަލައަށް ބޮޑު ހައްލެއް ލިބިގެންދާނެއެވެ.

އެމްޓީސީސީން އަންނަނީ މިލަންދޫ ގޮނޑުދޮށް ހިމާޔަތްކުރުމުގެ މަޝްރޫއުގެ ދެވަނަ ފިޔަވަހީގެ މަސައްކަތް ފެށުމަށް ތައްޔާރުވަމުންނެވެ. އެ ކުންފުނިން ބުނެފައިވަނީ އެކަމާ ބެހޭ މަޝްވަރާތައް ކުރެވެމުންދާ ކަމަށެވެ. ދެވަނަ ފިޔަވައްސާ އެކު އެ ރަށަށް ކުރިމަތިވެފަައިވާ ރަށްގިރުމުގެ މައްސަލައަށް ދާއިމީ ހައްލެއް ލިބޭނެއެވެ.

އާޒިމް ވިދާޅުވި ގޮތުގައި އެ ކުންފުނީގެ މަޝްރޫއުތައް ނިމިގެންދާއިރު، އެ ރަށުގެ ރައްޔިތުން މޫދަށް އެރިލާނެ ރީތި ބީޗެއް ތަރައްގީ ކުރައްވާނެ ކަމުގައެވެ.

އެމްޓީސީސީގެ ސީއީއޯ އާދަމް އާޒިމް އަދި މިލަންދޫ ދާއިރާގެ މެންބަރު އަލީ ރިޒާ - ފޮޓޯ:އެމްޓީސީސީ

މިލަންދޫގެ މަސައްކަތަށް ބޭނުންވާ ވަރަށް ގިނަ ތަކެތި ކުރިއަށް އޮތް 10 ވަރަކަށް ދުވަހުގެ ތެރޭގައި އެ ރަށަށް ގެންނާނެ ކަމަށާއި ޝެޑިއުލާ އެއްގޮތަށް މަސައްކަތް ކުރިއަށް ދާނެ ކަމަށް އާޒިމް ވިދާޅުވިއެވެ.

އެ ރަށުގައި ކުރިއަށްދާ މަޝްރޫއުތަކާ ބެހޭގޮތުން ވާހަކަދައްވަމުން މިލަންދޫ ދާއިރާގެ މެންބަރު އަލީ ރިޒާ ވިދާޅުވެފައިވަނީ އެމްޓީސީސީން ރަށުގައި ގިނަ މަސައްކަތްތަކެއް ކުރަމުންދާއިރު، އެކަމުން ރައްޔިތުންނަށް ބޮޑު ލުޔެއް ލިބޭނެ ކަމަށެވެ. ރިޒާ ވިދާޅުވީ މިއީ މިލަންދޫގެ ތަރައްގީއަށް އެއްފަހަރާ އެންމެ ގިނަ އަދަދެއްގެ މަޝްރޫއުތައް ކުރިއަށް ގެންދާ ދައުރު ކަމަށެވެ.

މި އަހަރުގެ ނިޔަލަށް އެ ރަށުގެ ބަނދަރުގެ މަސައްކަތާއި ގޮނޑުދޮށް ހިމާޔަތްކުރުމުގެ މަޝްރޫއު ނިންމުމަށް އެމްޓީސީސީން ދަނީ މަސައްކަތް ކުރަމުންނެވެ.