ހަނިމާދޫގައި ހަތަރު ފުރޮޅުލީ އުޅަނދު ދުއްވުމުގެ ލައިސަންސް ދޫކުރުމަށް ޑްރައިވިން ޓްރެކެއް އެޅުމުގެ މަސައްކަތް އެ ރަށު ކައުންސިލުން ހަވާލުކޮށްފައިވަނީ މިނެޓް ޕްލަސް ފްރައިވެޓް ލިމިޑެޓާއެވެ.
ހަނިމާދޫ ކައުންސިލުން ބުނީ މި މަސައްކަތަކީ މޯލްޑިވްސް ޓްރާންސްޕޯޓް އެންޑް ކޮންޓްރެކްޓިން ކޮމްޕެނީ (އެމްޓީސީސީ) ގެ އިޖުތިމާއީ ޒިންމާގެ ދަށުން ކުރިއަށް ގެންދާ މަސައްކަތެއް ކަމަށެވެ. ޓްރެކް އެޅުމުގެ މަަަސައްކަތަށް ބޭނުންވާ ހިލަ، ހިލަވެލި އަދި ސިމެންތި ހަމަޖައްސައިދިނީ އެމްޓީސީސީން ކަމަށާއި އެ ކުންފުނީގެ ފަރާތުން އަށްލައްކަ ރުފިޔާއަށް ވުރެ އިތުރަށް އެ މަސައްކަތަށް ހޭދަކުރާނެ ކަމަށް ހަނިމާދޫ ކައުންސިލުން ބުނެއެވެ.
ޑްރައިވިން ޓްރެކް އެޅުމުގެ މަސައްކަތް ހަނިމާދޫ ކައުންސިލުން މިނެޓް ޕްލަސްއަށް ހަވާލުކޮށްފައިވަނީ 25 ދުވަހުގެ ތެރޭގައި މަސައްކަތް ނިންމާ ގޮތަށެވެ.
ހަނިމާދޫގައި މިހާރު ދޫކުރަމުން އަންނަނީ ދެ ފުރޮޅުލީ އުޅަނދުގެ ލައިސަންސް އެކަންޏެވެ. އެ ރަށު ކައުންސިލުން ބުނެފައިވަނީ ރަށާ ކައިރި ރަށްރަށުގެ މީހުންވެސް ލައިސަންސް ނެގުމަށް އަންނަ ކަމަށެވެ.
ހަތަރު ފުރޮޅުލީ އުޅަނދު ދުއްވުމުގެ ލައިސަންސް ދޫކުރުމަށް އަޅާ ޑްރައިވިން ޓްރެކްގެ މަސައްކަތް ނިމި، އަންނަ ސެޕްޓެމްބަރު މަހު ލައިސަންސް ދޫކުރަން ފެށޭނެ ކަމަށް ހަނިމާދޫ ކައުންސިލުން ދެކެއެވެ.
