އެމްއެފްއެމްސީން ބުނީ މި މައުލޫމާތު ސެޝަނުގެ ތެރެއިން ފަތުރުވެރިކަމުގެ ސިނާއަތުގައި ގެސްޓްހައުސް ވިޔަފާރިތަކަށް ކުރިއެރުން ލިބޭނެފަދަ ދާއިރާތަކުން އަލިއަޅުވާލާފައިވާ ކަމަށެވެ. މި ޕްރޮޖެކްޓުގެ މައިގަނޑު މަގުސަދަކީ ވިލުންތެރި އަދި ސިންދަފާތުކުރެވިފައިވާ އިގުތިސޯދެއް ބިނާކުރުމަށް މަގުފަހިކޮށްދިނުން ކަމަށް އެ ކޯޕަރޭޝަނުން ބުނެއެވެ. އެމްއެފްއެމްސީން ބުނެފައިވަނީ މި ޕްރޮޖެކްޓު މެދުވެރިކޮށް ކޮވިޑް-19 ގެ ސަބަބުން ރާއްޖޭގެ ފަތުރުވެރިކަމުގެ ސިނާއަތަށް ދިމާވި ހީނަރުކަމުން އަރައިގަތުމަށް އެހީތެރިވުމުގެ ގޮތުން ދެ މިލިއަން ޔޫރޯ (34.5 މިލިއަން ރުފިޔާ) ގެ ހިލޭ އެހީ ހަދިޔާކޮށްފައިވާ ކަމަށެވެ. މި އެހީ ފޯރުކޮށްދީފައިވަނީ ފަތުރުވެރިކަމުގެ ސިނާއަތުގައި ހަރަކާތްތެރިވާ ކުމެވި ވިޔަފާރިތަކުގެ ތެރެއިން ގެސްޓްހައުސްތަކާއި ސަފާރީތަކަށް ކަމަށް އެމްއެފްއެމްސީން ބުނެއެވެ.
އެމްއެފްއެމްސީން ބުނި ގޮތުގައި މި ޕްރޮޖެކްޓުގެ ފުރަތަމަ ކޮމްޕޮނެންޓުގެ ދަށުން ވިޔަފާރިތަކަށް ހިލޭ އެހީގެ ގޮތުގައި 1.4 މިލިއަން ޔޫރޯ (25.3 މިލިއަން ރުފިޔާ) ވަނީ ދޫކޮށްފައި ކަމުގައެވެ. މިހާތަނަށް މި އެހީ ޖުމްލަ 406 ފަރާތަކަށް ފޯރުކޮށްދީފައިވާއިރު، އޭގެ ތެރޭގައި ހިމެނެނީ 341 ގެސްޓްހައުސް އާއި 65 ސަފާރީ ކަމަށް އެމްއެފްއެމްސީން ބުނެއެވެ. އެ ކޯޕަރޭޝަނުން ބުނީ މާފުށީގެ 21 ވިޔަފާރިއަކަށް ޖުމްލަ 1.6 މިލިއަން ރުފިޔާ ހިލޭ އެހީގެ ގޮތުގައި ފޯރުކޮށްދީފައިވާ ކަމަށެވެ.
މި ޕްރޮޖެކްޓުގެ ދެވަނަ ކޮމްޕޮނެންޓުގެ ދަށުން ގެސްޓްހައުސް ވިޔަފާރިތަކަށް ފަންނީ ކުރިއެރުމާއި މާލީ ތަރައްގީގެ ފުރުސަތުތަކަށް މަގުފަހިކޮށްދިނުމުގެ ގޮތުން ގެސްޓްހައުސް ހިންގުމާ ގުޅޭ އަށް ދާއިރާއަކަށް އަލިއަޅުވާލާފައިވާ ކަމަށް އެމްއެފްއެމްސީން ބުނެއެވެ. އެމްއެފްއެމްސީން ބުނި ގޮތުގައި ސެޝަން ނިމިގެންދިޔައިރު ވަނީ ފައިނޭންޝަލް މެނޭޖްމަންޓާއި ފްރަންޓް އޮފީސް އޮޕަރޭޝަނާއި ވޭސްޓް މެނޭޖްމަންޓުގެ އިތުރުން ދެމެހެއްޓެނިވި ތަރައްގީ އަދި ކޮވިޑް-19 ގެ ސަބަބުން ކުރިމަތިވި ގޮންޖެހުންތަކުން އަރައިގަތުމަށްޓަކައި އެޅިދާނެ ފިޔަވަޅުތަކާ ގުޅޭ މައުލޫމާތު ހިއްސާކޮށްފައި ކަމުގައެވެ. ސެޝަން ނިންމާލަމުން މާފުށީގެ 21 ގެސްޓްހައުސް ވިޔަފާރިއަކަށް ކޮމްޕޮނެންޓް އެކެއްގެ ދަށުން ލިބުނު ހިލޭ އެހީގެ ރަމްޒީ ފިލާ ހަވާލުކޮށްފައިވާ ކަމަށް އެމްއެފްއެމްސީން ބުނެއެވެ.
އެ ހަފުލާގައި ޑެލިގޭޝަން އޮފް ދަ ޔޫރަޕިއަން ޔޫނިއަން ސްރީ ލަންކާ އެންޑް މޯލްޑިވްސް، އެމްއެފްއެމްސީ އަދި މާފުށި ކައުންސިލުގެ ފަރާތުން ބައިވެރިވި ކަމަށް އެ ކޯޕަރޭޝަނުން ބުނެއެވެ. އެމްއެފްއެމްސީން ބުނެފައިވަނީ މި ޕްރޮޖެކްޓުގެ ތަންފީޒީ އިދާރާއަކީ އެ ކޯޕަރޭޝަން ކަމަށެވެ.
