ކަރެކްޝަންސް  ކުރި ޓުވީޓެއްގައި ވަނީ 28 އޯގަސްޓުގެ ނިޔަލަށް އަދީބު ސިންގަޕޫރުގައި ހުރުމުގެ ހުއްދަ އިތުރުކޮށްދީފައިވާކަމަށެވެ.

އަދި އެކަން ނިންމީ ހުށަހެޅި މެޑިކަލް ޑޮކިއުމެންޓުތަކަށް ބަލާފައި ކަމަށް ބުނެފައިވެއެވެ.

އަދީބު ސިންގަޕޫރަށް ވަޑައިގެންނެވީ ނުރައްކާވާ ފަދަ ނާރުގެ ބައްޔަކަށް ފަރުވާ ހޯދުމަށެވެ. 

އެކަމަށް ބޭސްފަރުވާއަށް ރާއްޖެއިން ބޭރަށް ދިއުމަށް މި މަހުގެ 12 ވަނަ ދުވަހު ސަރުކާރުން ދިނީ 10 ދުވަހުގެ މުއްދަތެކެވެ.

މައުލޫމާތު ލިބިފައިވާ ގޮތުގައި އަދީބް އަދި އިތުރު ޓެސްޓުތައް ހަދަން ޖެހޭތީ ދުވަސްތަކެއް ރާއްޖޭން ބޭރުގައިވާނެ ކަމަށް ބެލެއެވެ. އަދީބު ރާއްޖެއިން ބޭރަށް ވަޑައިގެންނެވީ އެކަމަށް ދޫކުރައްވާފައިވާ ވަގުތީ ޓްރެވަލް ޑޮކިއުމެންޓެއްގައެވެ.

އެމްއެމްޕީއާރުސީގެ ކޮރަޕްޝަންގެ މައްސަލަ އަދީބުގެ މައްޗަށް ސާބިތުވެ، 20 އަހަރުގެ ޖަލު ޙުކުމެއް އިއްވާ، 2 މިލިއަން ރުފިޔާއިން ޖޫރިމަނާގެ ޙުކުމެއް އަދީބުގެ މައްޗަށް އިއްވާފައިވަނީ 2020 ވަނަ އަހަރުއެވެ. އެހެންނަމަވެސް، އަދީބުގެ ސިއްޙީ ހާލަތު ހުރި ގޮތުން، މޯލްޑިވްސް ކަރެކްޝަނަލް ސާރވިސްއިން ވަނީ އޭނާ ގޭބަންދަށް ބަދަލުކޮށްފައެވެ.