ގއ. ދާންދޫ އުމުރުން 37 އަހަރުގެ ޝާހިދާ ހުސެއިން އަކީވެސް އެދުރު ދައިތައެކެވެ. ޅަ އުމުރުގައި ފެށުނު ގުރުއާން ކިޔަވައިދިނުން ފުޅާވެ މިހާރު ޝާހިދާ ކިޔަވައިދެނީ ގުރުއާން ކުލާސްތަކެއްގެ ގޮތުގަ ގޭގައެވެ.
ޝާހިދާގެ ބުނީ އޭނާ އަށް އެ މަސައްކަތް ފެށުނީ އޭނާގެ މަންމަ އާއި ބައްޕަ އަކީ ގުރުއާން ކިޔަވައިދޭ މީހެއް ކަމަށް ވުމާއިއެކު އުފެދުނު ޝައުގެއްގެ ބޮޑު ކަމުން ކަމަށެވެ.
ގއ. ދާންދޫ ޝާހިދާ ހުސެއިން....
ޝާހިދާ ދުވާލުގެ ހުރިހާވަގުތެއް ވެސް ހޭދަކުރަނީ ކުޑަކުދިންނަށް ގުރުއާން ކިޔަވައިދިނުމުގައިއެވެ. އެގޮތުން ފަތިހު ފަތިސް ނަމާދާއެކު ތެދުވެ ނަމާދު ކުރުމަށްފަހު ޝާހިދާގެ މަސައްކަތަކީ އަވަސް ގޭގައި ކާނެ އެއްޗެއް ރޯފިލުވުމެވެ.
އެއަށްފަހު އަވަސްވެގަންނަނީ ކިޔަވާކުދިން އަންނަންދެނެވެ. ހެނދުނު ކިޔަވައިދޭ ގަޑިއަކީ 7 ބައިން އަށް ގަޑިބައެވެ. މެންދުރު ގަޑިއަކީ މެންދުރު ނަމާދަށްފަހުގައެވެ. އަދި ހަވީރު ގަޑިއަކީ ހަތަރުގަޑި ބައެވެ.
މިއިން ކޮންމެ ގަޑިއެއްގަވެސް ޝާހިދާ ކުދިންނަށް ކިޔަވައިދިނުމަށްފަހު ވޮށުފިލާ އަޅައިދެއެވެ. މިހާރު ޝާހިދާގެ ކުލާހުގައި 23 ކުދިން ކިޔަވާ ކަމަށް ޝާހިދާ ބުންޏެވެ. ޝާހިދާބުނީ ކުދިންނަށް ގުރުއާން ކިޔަވައިދިނުމަކީ އޭނާ އަށް ލިބޭ އުފަލެއް ކަމަށެވެ. އެހެންކަމުން ކޮންމެ ދުވަހެއްގަވެސް އިރުއަރަނީ ކުދިންނަށް ކިޔަވައިދިނުމުގައި ކަމަށްވެސް ޝާހިދާ ބުންޏެވެ.
ޝާހިދާ ބުނީ ކުދިންނަށް ކިޔަވައިދޭން ފަށަނީ އެކުދިންގެ އުމުރުން 2 އަހަރުފެށުގެން 14 އަހަރުވާން ދެން ކަމަށެވެ. ކިޔަވައިދިނުމުގައި އެންމެ ބޮޑު އުފަލަކީ ކިޔަވެމަަށްފަހުވެސް ވަކިވާ ކުދިންގެ ފަރާތުން ހުންނަ ލޯތްބި ކަމަށް ޝާހިދާ ބުންޏެވެ.
ޝާހިދާ އަށް ކުދިންނަށް ގުރުއާން ކިޔަވައިދިނުމުގައިވެސް ގޮންޖެހުންތަކާއި ކުރިމަތިލާން ޖެހެއެވެ. އެއީ ކުދިން ލިބޭ މިންވަރު ގިނަވުމާއި، އެކުދިން ގެންގުޅެންޖެހެނީ ގޭގެ ސިޓީން ރޫމުގައި ކަމަށްވާތީ ކަމަށް ޝާހިދާ ބުންޏެވެ.
ގުރުއާން ކިޔަވައި ދިނުމުގައި ގިނަދުވަހެއް ހޭދަކޮށްފައިވާ ޝާހިދާގެ އުއްމީދެއް އެބައޮތެވެ. އޭނާ ބޭނުންވަނީ އޭނާގެ މަންމަ ގެ މަސައްކަތް ދިރުވައި އާލާ ކުރާށެވެ. އަދި ބެލެނިވެރިންގެ ފަރާތުން ވެސް ޝާހިދާ އެދެނީ ކިޔަވައިދިނުން އިތުރަށް ހަރުދަނާ ކުރުމަށް އެއްބާރު ލުންދިނުމަށެވެ.
ޝާހިދާ އޭނާގެ ޝުއޫރު ފާޅުކުރަމުން ޓީޗަރުންގެ ދުވަސްވެސް ފާހަގަ ކުރެވޭއިރު އެދުވަހުގެ އުފާ އޭނާ ވެސް ލިބިގަންނަން ބޭނުންވާ ކަމަށް ބުންޏެވެ. ޝާހިދާ ހުރީ ކިޔަވައިދިނުން ހުއްޓާލާކަހަލަ ގޮތަކަށް ނޫނެވެ. ޝާހިދާ ބޭނުންވަނީ އޭނާގެ ސިއްހަތު ތަންދޭ މިންވަރަކުން ކުދިންނަށް ގުރުއާން ކިޔަވައިދިނުމުގައި ދެމިހުންނާށެވެ.
