ކަސްޓަމްސްއިން ނެރެފައިވާ ތަފާސް ހިސާބުތައް ދައްކާގޮތުން،
- 2022 ވަނަ އަހަރުގެ ޖޫން މަހު 244 މިލިއަން ރުފިޔާގެ މުދާ އެކްސްޕޯޓް ކޮށްފައިވޭ
- މިދިޔަ މަހު އެކްސްޕޯޓް ކޮށްފައިވަނީ 266 މިލިއަން ރުފިޔާގެ މުދާ
- މިއީ ހަތް އިންސައްތައިގެ އިތުރުވުމެއް
އެކްސްޕޯޓް ކުރެވުނު މުދަލުގެ އަގު އިތުރުވިއިރު، 2022 ވަނަ އަހަރުގެ ޖޫން މަހާ އަޅާބަލާއިރު، ފާއިތުވެދިޔަ މަހު އިމްޕޯޓް ކުރެވުނު މުދަލުގެ އަގު ވަނީ ދަށްވެފައެވެ.
- 2022 ވަނަ އަހަރުގެ ޖޫން މަހު 5.2 ބިލިއަން ރުފިޔާގެ މުދާ އިމްޕޯޓްކޮށްފައިވޭ
- މިދިޔަ މަހު ހަތަރު ބިލިއަން ރުފިޔާގެ މުދާ ވަނީ އިމްޕޯޓްކޮށްފައި
- މިއީ 24 އިންސައްތައިގެ ދަށްވުމެއް
ނިމިދިޔަ މަހު ދައުލަތަށް ލިބުނު އާމްދަނީ 2022 ވަނަ އަހަރުގެ ޖޫން މަހާ އަޅާބަލާއިރު، 12 އިންސައްތަ ވަނީ ދަށްވެފައެވެ. މިދިޔަ އަހަރުގެ ޖޫން މަހު 394 މިލިއަން ރުފިޔާ ލިބިފައިވާއިރު، މި އަހަރުގެ ޖޫން މަހު ދައުލަތަށް އާމްދަނީގެ ގޮތުގައި ލިބިފައިވަނީ 347 މިލިއަން ރުފިޔާއެވެ.
ކަސްޓަމްސްގެ ތަފާސް ހިސާބުތައް ދައްކާގޮތުން މިދިޔަ މަހު ރާއްޖެއަށް އެންމެ ގިނައިން އެތެރެކޮށްފައިވަނީ ތެލެވެ. ޑީސަލް، ޕެޓްރޯލް އަދި އޭވިއޭޝަން ގޭހުގެ ގޮތުގައި 910 މިލިއަން ރުފިޔާގެ ތެޔޮ މިދިޔަ މަހު އެތެރެކޮށްފައިވެއެވެ. ދެ ވަނައަށް އެންމެ ގިނަ އަދަދަކަށް އެތެރެކޮށްފައިވަނީ މެޝިނަރީ އާއި އިލެކްޓްރިކަލް ސާމާނެވެ. ޖޫން މަހު ރާއްޖެއަށް 670 މިލިއަން ރުފިޔާގެ މެޝިނަރީ އާއި މެކޭނިކަލް އަދި އިލެކްޓްރިކަލް ސާމާނު އެތެރެކޮށްފައިވެއެވެ.
މިދިޔަ މަހު ރާއްޖޭން އެންމެ ގިނައިން ބޭރުކޮށްފައިވަނީ ގަނޑުކުރި ކަޅުބިލަމަހެވެ. އެގޮތުން، 140 މިލިއަން ރުފިޔާގެ ކަޅުބިލަމަސް ވަނީ ބޭރުކޮށްފައެވެ.
މިދިޔަ މަހު އަގުގެ ގޮތުން އެންމެ ގިނައިން އިމްޕޯޓްކުރި ގައުމުތަކާއި އެ ގައުމުތަކުން އިމްޕޯޓް ކުރެވުނު މުދަލުގެ އަގުތައް (ސީއައިއެފް އަގު):
- އޮމާން - 706 މިލިއަން ރުފިޔާ (18 އިންސައްތަ)
- ޗައިނާ - 550 މިލިއަން ރުފިޔާ (14 އިންސައްތަ)
- އިންޑިއާ - 545 މިލިއަން ރުފިޔާ (14 އިންސައްތަ)
- ޔޫއޭއީ - 439 މިލިއަން ރުފިޔާ (11 އިންސައްތަ)
- ސިންގަޕޫރު - 287 މިލިއަން ރުފިޔާ (7 އިންސައްތަ)
މިދިޔަ މަހު އަގުގެ ގޮތުން އެންމެ ގިނައިން އެކްސްޕޯޓް ކުރި ގައުމުތައް:
- ތައިލެންޑް (58 އިންސައްތަ)
- އިނގިރޭސި ވިލާތް (11 އިންސައްތަ)
- ޖަރުމަނު ވިލާތް (10 އިންސައްތަ)
- އިންޑިއާ (4 އިންސައްތަ)
- ފަރަންސޭސި ވިލާތް (2 އިންސައްތަ)
މި އަހަރުގެ ޖޫން މަހު 17،660 ޑިކްލަރޭޝަން ޕްރޮސެސްކޮށްފައިވެއެވެ. ނިމިދިޔަ އަހަރުގެ ޖޫން މަހު ޕްރޮސެސްކޮށްފައިވަނީ 19،228 ޑިކްލަރޭޝަނެވެ. މިދިޔަ މަހު ރާއްޖޭން ބޭރުން އައި 92 އުޅަނދަކަށް ކްލިއަރެންސް ދީފައިވާއިރު، 2022 ވަަނަ އަހަރުގެ ޖޫން މަހު 93 އުޅަނދަކަށް ކްލިއަރެންސްދީފައިވެއެވެ. ނިމިދިޔަ މަހު ރާއްޖޭން ބޭރަށް ފުރުމަށް 117 އުޅަނދަކަށް ކްލިއަރެންސް ދީފައިވާއިރު، 2022 ވަނަ އަހަރުގެ ޖޫން މަހު 114 އުޅަނދަކަށް ކްލިއަރެންސް ދީފައިވެއެވެ.
މިދިޔަ ޖޫން މަހު ރޯޔަލްޓީގެ ގޮތުގައި 37 މިލިއަން ރުފިޔާ ދައުލަތަށް ލިބިފައިވެއެވެ.
