އެނބޫދޫ ފަޅުގައި އެ ރިސޯޓު ހަދަނީ 'އެސް ހޮޓެލްސް އެންޑް ރިސޯޓްސް' އާއި 'ވާއި އެކޯ ވޯލްޑް ޑިވެލޮޕާ' އާ ގުޅިގެންނެވެ.
އެސްއޯ މޯލްޑިވްސްއަކީ އެކޯއިން ރާއްޖޭގައި ހަދާ ފަސްވަނަ ރިސޯޓެވެ. އަދި ކްރޮސްރޯޑްސްގައި ހުޅުވާ ތިންވަނަ ރިސޯޓެވެ. ހިލްޓަންގެ ސައި ލެގޫން އާއި ހާޑްރޮކް ބްރޭންޑްގެ ރިސޯޓެއް މިހާރުވެސް ކްރޮސްރޯޑްސްގައި އަންނަނީ ހިންގަމުންނެވެ.
އެސްއޯ މޯލްޑިވްސް ތަރައްގީ ކުރުމަށް 60 މިލިއަން ޑޮލަރު (925 މިލިއަން ރުފިޔާ) ހޭދަކުރިއިރު، އެ ރިސޯޓަކީ 80 ވިލާގެ ރިސޯޓެކެވެ. ޕްރައިވެޓް އައިލެންޑެއްގެ ގޮތުގައި ހެދި އެ ރިސޯޓުގައި މޫދު ވިލާތަކާއި ބީޗު ވިލާތަކުގެ އިތުރުން އާއިލާތަކަށް ހާއްސަ ވިލާތަކާއި ތިން ކޮޓަރީގެ ވިލާތައް ހިމެނެއެވެ.
ކްރޮސްރޯޑްސް: އެސްއޯ މޯލްޑިވްސްއަކީ ކްރޮސްރޯޑްސްގައި ހުޅުވާ ތިންވަނަ ރިސޯޓު - ފޮޓޯ:ކްރޮސްރޯޑްސް
ޔޫރަޕްގެ އެންމެ ބޮޑު އެއް ހޮސްޕިޓާލިޓީ ކުންފުނި، އެކޯއިން އަންނަނީ 110 ގައުމެއްގައި 5،100 ޕްރޮޕަޓީ ހިންގަމުންނެވެ. އެ ކުންފުނީގެ ދަށުން އެކި ގައުމުތަކުގައި 10،000 ފުޑް އެންޑް ބެވަރޭޖަސް ހިދުމަތްދޭ ތަންތަން ހިންގައެވެ.
ވެލާނާ އިންޓަނޭޝަނަލް އެއާޕޯޓު (ވީއައިއޭ) އިން ލޯންޗުގައި 15 މިނިޓުން ދެވޭ ހިސާބުގައި އެސްއޯ މޯލްޑިވްސް ތަރައްގީކޮށްފައިވަނީ ދިވެހިވަންތަ ސިފަތަކާ އެކުގައެވެ. މީގެ ކުރިން އެކޯއިން ރާއްޖޭގައި ޕުލްމަން އާއި މުވެންޕިލް އާއި ރަފްލްސް އަދި ފެއާމޮންޓް ބްރޭންޑްގެ ދަށުން ރިސޯޓުތައް ވަނީ ހުޅުވާފައެވެ.
