ގާންދީގެ މައްޗަށް ހުކުމް ކޮށްފައި ވަނީ 2019 ވަނަ އަހަރު އޭނާ ދެއްވި ތަޤުރީރެއްގައި ވިދާޅުވެފައިވާ ބަސްފުޅުތަކަކާ ގުޅިގެންނެވެ. އެ ތަޤުރީރު ދެއްވަމުން އޭނާ ވަނީ، މޯދީގެ ނަން ދީފައިވާ ހުރިހާ އެންމެންނަކީ ވެސް ވައްކަން ކުރާ މީހުންތޯ ސުވާލު އުފައްދަވާފައެވެ. މިއީ، ބޮޑުވަޒީރު ނަރެންދުރަ މޯދީގެ އަބުރަށް އަރައިގަތުމުގެ އަމަލެއްގެ ގޮތުގައި ކޯޓުން ވަނީ ކަނޑައަޅާފައެވެ.
52 އަހަރުގެ ގާންދީގެ މައްޗަށް އިއްވާފައި ވަނީ ދެ އަހަރު ދުވަހުގެ ޖަލު ހުކުމެކެވެ. ނަމަވެސް، ހުކުމް ތަންފީޒުކުރަން ފެށުމުގެ މުއްދަތު އެއް މަސް ދުވަހަށް ކޯޓުން ވަނީ ފަސްކޮށްދީފައެވެ. އަދި، ކަފާލާތުގެ ދަށުން އޭނާ ހުރީ މިނިވަންކޮށްފައެވެ. މި ހުކުމާ ގުޅިގެން އިންޑިޔާގެ ޤާނޫނު ހަދާ މަޖިލީހުގެ ތިރިގެ ކަމުގައިވާ ލޮކް ސަބާއިން ވަނީ، ގާންދީގެ ކެރެލާގެ ދެކުނު ސްޓޭޓް, ވަޔަނާޑްގެ މަޖިލިސް ގޮނޑި ގެއްލިފައިވާ ކަން ކަނޑައަޅައި، އޭނާއަށް މަޖިލީހަށް ވަނުމަށް ހުރަސް އަޅާފައެވެ. އަދި މި ހުކުމާ ގުޅިގެން އަންނަ އަހަރުގެ އާންމު އިންތިހާބުގައި ވާދަކުރުމުގެ ފުރުސަތު ވެސް ބަންދުވި އެވެ.
ގާންދީގެ މައްޗަށް އިއްވާފައި ވަނީ ސިޔާސީ ހުކުމެއް ކަމަށް ކޮންގްރެސް ޕާޓީން ގަބޫލުކުރެއެވެ. ނަމަވެސް ގުޖުރާތުގެ ދަށު ކޯޓުތަކާއި ހައި ކޯޓުން ވަނީ ގާންދީގެ މައްޗަށް އިއްވާފައިވާ ހުކުމް ސަސްޕެންޑް ކުރުމަށް ކުރި އިސްތިއުނާފް މައްސަލަ ބަލައިނުގެންފަ އެވެ. އަދި އެއާ އެކު އޭނާ އެ މައްސަލަ ސުޕްރީމް ކޯޓުގައި އިސްތިއުނާފު ކުރި އެވެ.
އިންޑިއާގެ ސުޕްރީމް ކޯޓުން މިއަދު ވަނީ އެ ހުކުމަށް އަމަލުކުރުން މަޑުޖައްސާލަން އަމުރެއް ނެރެފަ އެވެ. އެއާ އެކު، އެ މައްސަލަ ނިމެންދެން ރާހުލްގެ މެމްބަރުކަމުގެ ގޮނޑި އާއި އަންނަ އަހަރުގެ އާންމު އިންތިހާބުގައި ވާދަކުރުމުގެ ފުރުސަތު ކުރީގެ ބޮޑުވަޒީރު ރަޖީވް ގާންދީގެ ދަރިކަލުން އަދި އޭގެ ކުރީގެ ބޮޑުވަޒީރު އިންދިރާ ގާންދީގެ މާމަ ދަރިކަލުން ކަމަށްވާ ރާހުލްއަށް މިހާރު ވަނީ ލިބިވަޑައިގެންފަ އެވެ.
