ރައީސް ޔާމީން މިއަދު މި ސުވާލު އުފެއްދެވީ، ސުޕްރީމް ކޯޓުގައި ރައީސް ޔާމިންގެ ފަރާތުން އިލެކްޝަންސް ކޮމިޝަން (އީސީ)އާއި ދެކޮޅަށް ހުށަހަޅާފައިވާ މައްސަލައިގައި، އެމަނިކިފާނުގެ ދިފާއުގައި ވާހަކަ ދައްކަވަމުންނެވެ.
އީސީއާ ދެކޮޅަށް ރައީސް ޔާމިން މައްސަލަ ހުށަހެޅުއްވީ އެމަނިކުފާނުގެ ކެނޑިޑަސީ ގަބޫލުނުކުރަން ނިންމުމުންނެވެ.
ރައީސް ޔާމިން ވިދާޅުވީ، އެމަނިކުފާނުގެ ކެނޑިޑަސީއާމެދު ސުވާލު އުފެދިގެން އުޅެނީ ހައިކޯޓުން ވެސް އެމަނިކުފާނުގެ އިސްތިއުނާފުގެ މައްސަލަ ނުނިމުމުންކަމަށެވެ. އަދި ރައީސް ޔާމިންގެ އިސްތިއުނާފުގެ މައްސަލަ ނުނިމުކަކީ "އެޑްމިނިސްޓްރޭޓިވް ޖަސްޓިސް" ނުލިބުންކަމަށް އެމަނިކުފަނު މިއަދު ވިދާޅުވިއެވެ.
ރައީސް ޔާމިން ވިދާޅުވީ ހައިކޯޓަށް ވ. އާރަށުގެ މައްސަލައިގައި އިއްވާފައިވާ 11 އަހަރުގެ ޖަލުހުމުގެ މައްސަލަ އިސްތިއުނާފު ކުރީ ދަށު ކޯޓުން ނިންމާފައިވާ ނިންމުންތަކުގައި "ފަރުވާ ލިބެންޖެހޭ ކަންތައްތަކެއް ހުރިކަން ގަބޫލުކުރެވޭތީ،" ކަމަށެވެ.
އެމަނިކުފާނު ވިދާޅުވީ އިސްތިއުނާފުގެ މަރުހަލާ ކިތަންމެ ދިގުވެގެންވެސް ހިނގައިދާނެކަމަށެވެ. އަދި އެއީ އެމަނިކުފާނުގެ އަތުގައި އޮތް ބާރެއްވެސް ނޫންކަމަށާއި، އެއީ ފޮތެއްގައި ލިޔެފައި އޮތް ގޮތެއްވެސް ނޫންކަމަށެވެ.
