އުމުރުން ދުވަސްވީ ފަރާތްތަކަށް ހާއްސަކޮށް ރައީސް ސޯލިހު ވައުދުތަކެއް ވެވަޑައިގެންފައި މިވަނީ ގއ އަތޮޅަށް ކުރައްވަމުން ގެންދަވާ ކެމްޕޭން ދަތުރުފުޅުގެ ތެރެއިންނެވެ. ގއ.މާމެންދޫގައި ވާހަކަފުޅު ދައްކަވަމުން ރައީސް ސޯލިހު ވިދާޅުވީ ކުރިއަށް އޮތް 10 ވަރަކަށް އަހަރު ތެރޭގައި މިހާރު މިއޮތް އާބާދީ އުމުރުން ދުވަސްވީ މީހުންނަށް ބަދަލުވާނެ ކަމަށާއި އެއީ ދުރާލާ ވިސްނަން ޖެހޭ ކަމެއް ކަމަށެވެ.
ގަދަރުވެރި ދިރިއުޅުމެއް ހޯދައި ދިނުމަށް އެމަނިކުފާނުގެ ސަރުކާރުން ކުރައްވަމުން ގެންދަވާ މަސައްކަތުގެ ތެރެއިން އުމުރުން ދުވަސްވީ ފަރާތްތަކަށް ސައިކޮސޯޝަލް ސަޕޯޓު ފޯރުކޮށްދޭން ފައްޓަވާނެ ކަމަށާއި ދޮށީ އުމުރުގެ ފަރާތްތަކަށް ހާއްސަ ސިއްހީ ފަރުވާ ސިއްހީ މަރުކަޒުތަކުގައި ގާއިމުކޮށްދެއްވާނެ ކަމަށް ރައީސް ސޯލިހު ވިދާޅުވިއެވެ. އުމުރުން ދުވަސްވީ ފަރާތްތަކަށް ހާއްސަކޮށްގެން ސަރުކާރުން މިހާރު ވެސް ކުރިއަށް ގެންދަމުންދާ ރަންވޭލާ ޕްރޮގުރާމު އިތުރަށް ފުރިހަމަކޮށް ދާންމަތިވެފައި ތިބޭ ދުވަސްވީ މީހުންނަށް ސިއްހީ ހިދުމަތްތެރިން ޒިޔާރަތްކޮށް ހާލުބަލައި ބޭނުންވާ އެހީތެރިކަން ލިބޭނެ ގޮތް ފަހިކޮށްދެއްވާނެ ކަމަށް ރައީސް ވިދާޅުވިއެވެ.
ދޮށީ އުމުރުގެ މީހުންނަށް ބޭނުންވާ އެކި އެކި މައުލޫމާތު އެއްތަނަކުން ފޯރުކޮށްދެވޭނެ އިންތިޒާމު ހަމަޖައްސަވާނެ ކަމަށާއި އެކި ކަންތައްތަކުގައި އެހެން އުމުރު ފުރާގެ މީހުންނާއެކު އުޅެވޭނެ މަގުފަހިކޮށްދޭނެ ކަމަށާއި ޒުވާން ޖީލަށް ދޮށީ އުމުރުގެ ތަޖުރިބާ ހިއްސާ ކުރެވޭނެ އިންތިޒާމު ހަމަޖައްސަވާ ދެއްވާނެ ކަމަށް ވެސް ރައީސް ސޯލިހު ވިދާޅުވިއެވެ.
ރައީސް ސޯލިހު ވިދާޅުވީ އެ ސިޔާސަތުތަކަކީ ބަދަހި މުޖުތަމައަކަށާއި އުފާވެރި ދިރިއުޅުމަށް އެމަނިކުފާނުގެ ސަރުކާރެއްގެ ދެވަނަ ދައުރުގައި ކުރަން ރާވާފައިވާ ބައެއް ކަންތައްތައް ކަމަށެވެ.
އިތުރަށް ވާހަކަފުޅު ދައްކަވަމުން ރައީސް ސޯލިހު ވިދާޅުވީ ކުރިއަށް އޮތް ފަސް އަހަރުގެ ދައުރަށް ވެސް އެމަނިކުފާނުގެ ޕްލޭނެއް އެބައޮތް ކަމަށެވެ. އެ ޕްލޭން އެކުލަވާލާފައިވަނީ ރަށްރަށުން ލިބިފައިވާ ހިޔާލުތަކާއެކު ކަމަށާއި އެއީ ހިޔާލީ ވާހަކަތަކެއް ނޫން ކަމަށެވެ.
