އެމްޑީޕީގެ ރިޔާސީ ކެންޑިޑޭޓުގެ ހައިސިއްޔަތުން ނ. އަތޮޅުގެ ރަށްތަކަށް އިއްޔެ ފެށި ކެމްޕެއިން ދަތުރުގައި މިއަދު ހެނދުނު ނ. ޅޮއްސަށް ވަޑަައިގެން އެ ރަށުގެ ސަޕޯޓަރުންނާ ބައްދަލުކުރައްވާ ރައީސް ވިދާޅުވީ ރަށްރަށުގައި ހުރި ފެނާއި ނަރުދަމާ އާއި ސިއްހީ ހިދުމަތާއި ތައުލީމާއި ލަފާ ފުރުމާ ހައްލުކުރަމުންދާއިރު، މުޅި ރާއްޖެ އެކީގައި ވިއުގައަކުން ގުޅާލުމަކީ ވީ ވައުދެއް ކަމަށެވެ.
ކަނޑުމަގުންނާއި ވައިގެމަގުން ދަތުރުކުރެވޭނެ ފަސޭހަގޮތްތަކެއް ހޯދައިދިނުމަކީ ވީ އެއް ވައުދުކަން ފާހަގަކުރައްވާ ރައީސް ވިދާޅުވެފައިވަނީ އާރުޓީއެލްގެ ހިދުމަތް ބޮޑުތިލަދުންމަތީގައި ފެށި، ހުވަދު އަތޮޅުގައިވެސް ފަށައި މިހާރު ކުރިއަށްދާ ކަމަށެވެ. ރައީސް ވިދާޅުވި ގޮތުގައި އެ ހިދުމަތް ދެން ފަށާނީ ނ. އަތޮޅުގައި ކަމުގައެވެ.
ރައީސް ވިދާޅުވީ އެކަމުގެ ސަބަބުން ހީނުކުރާވަރުގެ ކުރިއެރުމެއް ރަށްތަކަށް ލިބިގެންދާނެ ކަމަށާއި އެ މަންޒަރު ބޮޑުތިލަދުންމަތިންނާއި ހުވަދު އަތޮޅުން ފެންނަމުންދާ ކަމަށެވެ. ސިއްހީ ހިދުމަތް ހޯދުމަށާއި ވިޔަފާރި ދަތުރުގެ ގޮތުގައި ނުވަތަ އެނޫން ބޭނުންތަކުގައިވެސް ހެނދުނު ފުރައިގެން ގޮސް އެނބުރި ރަށަށް އާދެވޭނެ ކަމުގެ ޔަގީންކަން އެ ހިދުމަތުން ލިބިގެންދާ ކަމަށް ރައީސް ވިދާޅުވިއެވެ.
ރައީސް ވިދާޅުވި ގޮތުގައި އާރުޓީއެލް ފެރީގެ ހިދުމަތާ އެކުގައި ނ. އަތޮޅަށްވެސް ބޮޑު ބަދަލެއް އަންނަތަން ފެނިގެންދާނެ ކަމުގައެވެ.
